Mickey 'sal Aussies uitstekend afrig'
2011-09-21 18:30
Kaapstad – Die Australiese kolf-ster Shaun Marsh het sy ondersteuning aan Mickey Arthur uitgespreek en gesê hy sal ‘n uitstekende werk doen as afrigter van die Australiese krieketspan, indien hy aansoek doen vir die pos.
Luidens die webwerf Sportal.com is Arthur, wat Westelike Australië op die oomblik afrig, een van die gunstelinge om die werk as afrigter van die nasionale span by Tim Nielsen oor te neem nadat dié besluit het om nie weer vir die pos aansoek te doen nie, ondanks sy rol in Australië se onlangse toetsreeks-oorwinning teen Sri Lanka.
Met Nielsen wat uittree voor volgende maand se toer na Suid-Afrika, is Arthur volgens beroepswedders die vierde gunsteling kandidaat om oor te neem, na Steve Rixon, voormalige afrigter van Nieu-Seeland, Justin Langer en Tom Moody.
Arthur was sedert verlede seisoen Marsh se afrigter by die Warriors ná ‘n morsige einde aan sy loopbaan as afrigter van Suid-Afrika vroeg in 2010, maar Marsh glo hy sal ‘n uitstekende werk vir Australië doen.
“Dit hang heeltemal van Mickey af,” het Marsh in Perth gesê ná sy terugkeer uit Sri Lanka, waar hy ‘n suksesvolle debuut vir die Australiese span beleef het.
“Hy het my beslis baie met my spel gehelp en ek is seker hy sal ‘n baie goeie werk doen.
“Hy het ‘n baie goeie krieketbrein. Jy kan die hele dag met hom sit en oor krieket praat.
“Hy kommunikeer baie goed met sy spelers... maar ek is seker sy hoof-prioriteit is op die oomblik by Westelike Australië se krieket. Hy wil hê ons moet baie goed vertoon hierdie somer.”
- Vir die jongste sportnuus, volg Nuus24Sport op Twitter
- Sport24