Meer as R1,5 m. vir Philander aangebied
2012-02-04 07:15
Bloemfontein – Herschelle Gibbs staan straks met Saterdag se veiling in Bangalore ’n kans om ’n bod op hom te verenig en weer in die Indiese Premierliga (IPL) krieket te speel.
Die 37-jarige Suid-Afrikaner, wat voorheen vir die Deccan Chargers gespeel het, se kolf was aan die brand vir die Perth Scorchers in die Big Bash-liga. Hy het die beste vertoon van al die oorsese spelers in dié afgelope Australiese blitsreeks.
Die minimum bod op Gibbs is boonop relatief min.
Dit beloop slegs R400 000, wat ook die intreebod vir die Suid-Afrikaanse snelbouler Marchant de Lange is.
Sy landgenote Vernon Philander en die voormalige Indiese Krieketliga-speler Nicky Bojé se laagste bod is heelwat meer, R1,6 miljoen.
Altesame 30 Suid-Afrikaners is van die hoopvolles op die lys wat op 30 Januarie aan die media beskikbaar gestel is. Philander, De Lange, Mark Boucher, Jacques Rudolph, Robin Peterson, Imran Tahir, Lonwabo Tsotsobe en Alviro Petersen is van spelers wat dié seisoen vir die Proteas in aksie was.
Uit Indië word berig 144 spelers van 11 lande is op vandag se vyfde veiling beskikbaar.
Die meeste van hulle gaan teleurgesteld wees.
Hoewel die franchises hul groepe van 30 tot 33 spelers mag uitbrei, is die verwagting dat sowat 20 tot 30 spelers uit die groot groep spelers bykomend gekontrakteer sal word, berig espncricinfo.com.
Die veelsydige Ravindra Jadeja van die Kochi Tuskers Kerala sal glo ’n gesogte kopie wees.
Die Kochi-span is deur die Indiese Krieketbeheerraad ontbind nadat ’n ooreenkoms verbreek is.
Die franchise se spelers is almal vir die veiling beskikbaar gestel.
Kochi se topkolwers verlede jaar, Mahela Jayawardena van Sri Lanka en die Kiwi Brendon McCullum, sal ook in aanvraag wees.
McCullum het in die heel eerste wedstryd van die eerste IPL – in 2008 – 158 onoorwonne lopies van 73 balle vir die Kolkata Knight Riders teen die Royal Challengers Bangalore gemoker. Sy intreebod is R3,2 miljoen.
Die Royal Challengers Bangalore kon hul mokerman Chris Gayle van die Windies teen $550 000 behou.
Dis R800 000 meer as wat hy hulle verlede jaar gekos het.
– Sport24
– Bly op hoogte van al die jongste sportnuus deur Nuus24Sport op Twitter te volg