Media kap Aussies oor 'reuse-mislukking'

2012-12-04 08:32

Perth – Die Australiese media het Dinsdag dié land se nasionale krieketspan behoorlik oor die kole gehaal oor hulle nederlaag in die toetsreeks teen Suid-Afrika.

Die media het die nederlaag as 'n "reuse-mislukking" bestempel en die einde van die voormalige kaptein, Ricky Ponting, se luisterryke loopbaan betreur.

Suid-Afrika het die tuisspan met 'n oortuigende 309 lopies in Perth geklop, en sodoende hulle eerste plek op die wêreldranglys behou.

Ponting, die man met die tweede hoogste aantal lopies in toetskrieket, is met net agt lopies terug pawiljoen toe gestuur.

"Perth was 'n enorme mislukking op 'n kritieke oomblik en herinner 'n mens weer dat Michael Clarke se span nommer drie is – dit gaan beter op 'n goeie dag en slegter op 'n slegte dag soos dié," het The Australian se Peter Lalor geskryf.

"Die gaping tussen nommer een en drie het nog nooit so groot gelyk soos met hierdie wedstryd nie."

Die Sydney Morning Herald het ook kritiek gelewer: "Dis teleurstellend genoeg dat Ricky Ponting' se swanesang 'n oninspirerende poging vir agt lopies was," het die koerant geskryf.

– Volg Nuus24 op Twitter.

- Sapa - AFP