McLaren sal keurders se oë laat rek
2010-10-02 07:50
Kimberley - Ná twee dae was daar steeds nie ’n enkele kolwer met ’n honderdtal in die SuperSport-krieketreeks nie.
Die Warriors se Ashwell Prince (95*) kan op die derde dag teen die Titans vanoggend in Centurion die eerste wees.
Die Titans se Heino Kuhn is in dieselfde wedstryd gister op 94* gestrand gelaat, terwyl die Knights se kaptein, Morné van Wyk, op 97 hier deur die Dolphins uitgehaal is.
Op Randjesfontein het die Leeus se Vaughn van Jaarsveld (87) tot nou die beste met die kolf – teen die Cape Cobras – gevaar.
Die tuisspanne is steeds in beheer.
* Ryan McLaren het Vrydag hier op die Diamant-oval ’n opslagbal na die SA keurders afgestuur. Hy het sy 68 lopies in die Knights se eerste beurt van 407 teen die Dolphins met ’n uitstekende boulvertoning opgevolg.
Die Dolphins sal vanoggend op 143/5, ’n agterstand van nog 264, voortkolf nadat McLaren (3/59) vroeg toegeslaan het.
McLaren het met sy onlangse weglating uit die Protea-span gesê hy sal nie gaan lê nie. As hier ’n SA keurder was, sou sy selfoon lank teen sy oor gewees het toe McLaren Loots Bosman en die Amla-broers (nulletjies) op ’n streep storte toe gejaag het. Dit het in ses aflewerings gebeur.
Bosman (20) is met ’n droomaflewering geboul. ’n Inswaaier het die wegpen ontwortel.
Prince en Jon-Jon Smuts (78) was aan die spits van die Warriors se terugvegpoging.
Die Titans is vroeër vir 318 uitgehaal in hul eerste beurt in antwoord op die skamele 89 van die Warriors op die eerste dag.
Die Warriors het met uitskeityd in hul 2de beurt 221/3 – ’n agterstand van 8 lopies – gehad.
Op Randjesfontein hervat die Lions sake op 409/8 in hul eerste beurt nadat die Cobras 197 in hul eerste beurt gekry het.
- Volg Nuus24Sport op Twitter.