Mark Boucher tree uit ná fratsongeluk
2012-07-10 14:34
Kaapstad – Die Proteas se veteraan-paaltjiewagter Mark Boucher het Dinsdag sy uittrede uit internasionale krieket aangekondig nadat hy sy oog ernstig beseer het in 'n Boucher-na-ernstige-oogbesering-20120710">fratsongeluk.
Boucher moes Maandagaand 'n noodoperasie ondergaan nadat ’n dwarsbalkie hom, tydens die Proteas se opwarmwedstryd teen die graafskapspan Somerset, in die oog getref het, het Krieket Suid-Afrika (KSA) in 'n verklaring op sy webwerf gesê.
Volgens die Proteas se spandokter, dr. Mohammed Moosajee, sal Boucher binnekort na Suid-Afrika terugkeer.
Sy plaasvervangers sal Woensdag bekendgemaak word.
Die Proteas se toetskaptein, Graeme Smith, het Boucher se verklaring Dinsdag aan die media voorgelees.
"Dit is met groot hartseer en pyn dat ek hierdie aankondiging moet maak. Weens die erns van my besering sal ek nie weer internasionale krieket kan speel nie," het Boucher se verklaring gelui.
"Ek het so baie mense om te bedank en sal dit op 'n latere stadium persoonlik doen. Baie dankie vir al die boodskappe van ondersteuning, ek waardeer dit opreg."
Smith het ook 'n persoonlike boodskap aan sy spanmaat gerig. "Bouch, ons stap al 'n lank pad saam. Dit is jammer dat dinge so moes eindig. Vir 14 jaar van internasionale krieket was jy 'n ware Protea-vegter. Iemand wat niks gevra het nie en alles gegee het. Ons wens jou 'n spoedige herstel toe en alle voorspoed vir die toekoms."
Die 35-jarige se loopbaan het op 999 internasionale vangskote geeïndig.
Volg Nuus24Sport op Twitter.
- SAPA
