Makhaya Ntini straks SA-keurder
2012-12-10 15:22
Kaapstad – Krieket Suid-Afrika (KSA) gaan vroeg aanstaande jaar 'n swart keurder aanstel in 'n poging om dié sport demografies verteenwoordigend te maak, het ESPNCricinfo Maandag berig.
"Ons wil transformeer en die land se demografie so goed moontlik verteenwoordig. 'n Swart keurder is nodig om te help met verteenwoordiging op alle vlakke, het Jacques Faul, tussentydse hoof van KSA, gesê.
Faul het dit egter duidelik gestel dat die skuif nie beskou moet word as 'n stap wat daarop gemik is om slegs swart spelers te baat nie.
"Net soos wat wit keurders nie slegs wit spelers kies nie, so sal swart keurders ook nie net swart keurders kies nie," het Faul verduidelik.
Volgens ESPNCricinfo is die voormalige snelbouler Makhaya Ntini tans die gunsteling om in die pos aangestel te word ten spyte van sy kritiek oor die samestelling van die Protea-span voor hul toer na Australië.
Ntini het vroeër gesê die plaasvervanger-paaltjiewagter Thami Tsolekile sou lankal vir die Proteas gespeel het as hy wit was.
Die Proteas het in Perth in hul 200ste toets gespeel, maar sedert hertoelating het nog net vyf swart spelers Suid-Afrika verteenwoordig.
Van die vyf spelers het Ntini in 101 toetse gespeel maar die ander vier, Mfuneko Ngam, Monde Zondeki, Tsolekile en Lonwabo Tsotsobe het saam minder as 20 toetse op hul kerfstok en Suid-Afrika het in 2012 nie een swart speler in 'n toetsspan gehad nie.
Die Proteas sal Donderdag die T20- en toetsspanne vir die opkomende reeks teen Nieu-Seeland aankondig.
Lees die volledige artikel hier.
Intussen is Ntini Maandag as die bestuurder van die Kaizer Chiefs-sewesspan vir die naweek se Premierliga-toernooi in George aangestel. Die Chiefs sal deur die oud-Springbok Breyton Paulse aangevoer word.
Vir die jongste sportnuus volg Nuus24Sport op Twitter.
– Cricinfo
