Majola nou in spervuur
2011-05-06 09:16
Johannesburg - Die gety in Suid-Afrikaanse krieket het gedraai met die heraanstelling van Mtutuzeli Nyoka as president van Krieket Suid-Afrika (KSA), en nou is Gerald Majola vierkant in die spervuur.
Majola, die uitvoerende hoof van dié beheerliggaam, moet opnuut verduidelik waarom miljoene rande se bonusse aan hom en sowat 40 ander KSA-werknemers nie verklaar is nie én wat geword het van R84,6 miljoen wat glo uit KSA se geldkoffers verdwyn het.
Dít volg nadat die land se 11 uniepresidente Woensdagaand op ’n vergadering “eenparig” besluit het om nie appèl aan te teken nie teen ’n hofuitspraak vroeër waarin die ontslag as onregmatig bestempel is.
Nyoka en Majola was sedert verlede jaar haaks oor dié bonusse, wat spruit uit die aanbieding van die Indiese Premierliga en die Kampioenetrofee-toernooi in Suid-Afrika.
Nyoka het in Februarie die trekpas gekry toe nege van die einste presidente ’n mosie van wantroue teen hom ingestel het.
Hy het hom egter verlede maand tot die Johannesburgse hooggeregshof gewend, waarna KSA aangekondig dat dit dié beslissing sou teenstaan. Sport24 verneem dit was eerder Majola wat eergisteraand geroskam is deur KSA se ouditeurs.
Deloitte het verlede jaar ingestem om KSA se finansiële jaarverslag goed te keur, mits ’n onafhanklike ondersoek van stapel gestuur sou word. Majola-hulle het aanvanklik ingestem, maar kort daarna ontslae geraak van ’n ondersoekspan onder leiding van die voormalige hoofregter Pius Langa.
’n Interne komitee, met KSA se adjunkpresident, AK Khan, aan die spits, het Majola daarna van enige oortreding vrygespreek.
Hoewel Majola sy bonus, bykans R2 miljoen, aan KSA terugbetaal het, het Nyoka in die openbaar uitgevaar teen die besluit om weg te doen met die Langa-ondersoek.
Majola het selfs met regsoptrede gedreig nadat Nyoka hom onder meer ’n leuenaar genoem het in ’n radio-onderhoud en voorgeneem het om korrupsie binne KSA te ontbloot.
Nyoka is eergisteraand nie gevra om dié en ander aantygings te verduidelik, soos KSA aanvanklik geëis het, nie.
* Aan Sport24 is gesê die vonke het Woensdagaand “behoorlik gespat” toe ván die uniepresidente beswaar aangeteken het teen Nyoka as voorsitter van dié vergadering. Tog het hy én Majola by navraag gesê die strydbyl is begrawe.“Dis waar dat daar ernstige probleme was wat die land se krieket erg geskaad het,” het Nyoka gesê. “Die vergadering het egter in ’n baie goeie gees geskied. “Ek en Gerald het saam grootgeword en het dikwels al koppe gestamp, maar ons het vandag hande geskud in die belang van Suid-Afrikaanse krieket en ons respekteer mekaar.” Majola het volgehou dat hy Nyoka “onvoorwaardelik sal steun”.
* Intussen het die Suid-Afrikaanse Sportkonfederasie en Olimpiese Komitee (Saskok) Donderdag aangebied om die ondersoek te lei. Luidens ’n verklaring deur KSA sal ’n besluit hieroor eersdaags geneem word.
Vir die jongste sportnuus volg Nuus24Sport op Twitter.
- Sport24