Majola: Berigte oor swart breier is twak

2010-02-01 09:57

Christo Buchner

Johannesburg - Gerald Majola, uitvoerende hoof van Krieket Suid-Afrika (KSA), het gister ’n berig afgelag dat van Mickey Arthur as afrigter van die Suid-Afrikaanse krieketspan ontslae geraak is om die deur oop te kry sodat ’n swart afrigter aangestel kan word.

“Die redes dat Mickey nie meer ’n afrigter is nie, is in detail uitgespel op verlede week se mediakonferensie in Oos-Londen. Daar is niks verder daaromtrent nie en ook geen ander sinistere redes dat hy nie meer daar is nie. Ek het beslis ook niks om weg te steek in dié verband nie,” het Majola gesê.

“In hierdie stadium kan niemand sê wie die volgende afrigter gaan wees nie. Ons sal dit eers op 19 Februarie bespreek en dan besluit op die wyse waarop die nuwe afrigter aangestel sal word. Dit is nie net die aanstelling van die afrigter wat dan bespreek sal word nie, maar ook die nuwe struktuur wat vir Suid-Afrikaanse krieket beplan en die wyse waarop die nuwe keurkomitee saamgestel sal word.

“Enigiets wat nou oor enige van dié aangeleenthede gesê word, is pure bespiegeling en ek wil my nie eens daaroor uitlaat nie.”

Oor die bewering dat hy baie ongelukkig was dat Makhaya Ntini uit die span gelaat is vir die laaste twee toetse, sê Majola dit is onsin.

“Ek is dan die een wat my goedkeuring aan die span gee voordat dit aangekondig word. As ek nie tevrede was dat Makhaya nie daar was nie, sou ek dit mos nie toegelaat het dat hy nie gekies word nie.

“Waar ek wel my voet neergesit?(...) het, was met die insluiting van Imran Tahir in die groep vir die vierde toets op die Wanderers. Hy is skaars ’n dag nadat hy gekies is weer uit die groep gelaat, want ek was nie gediend daarmee dat hy gekies word terwyl hy nog nie verkiesbaar is en aan al die vereistes voldoen nie.”

Majola ontken ook ten sterkste dat die hulpafrigter Vincent Barnes eers genader is om die span na ­Indië te neem, maar dat hy die voorwaarde gestel het dat eers van Graeme Smith as kaptein ontslae geraak word en dat Jeremy Snape, die kopdokter, en Mark Boucher, senior speler, gepos word.

“Ek kan dit onomwonde stel dat net een mens genader is om die span in Mickey se plek Indië toe te vat en dit is Corrie van Zyl,” sê hy.

Wat Smith se beweerde oorheersende rol in Suid-Afrikaanse krieket betref, het Majola gesê: “Graeme het geen sê in wie uiteindelik speel nie. Ek weet dus nie waar kom dit vandaan dat hy so ’n magtige figuur is nie.”

-  Beeld