Lid van Krieket SA in kaping geskiet
2010-03-09 14:17
Johannesburg - Niels Momberg, die bestuurder van skolekrieket in Suid-Afrika, sterk tans in die hospitaal aan nadat hy Maandag in 'n mislukte kaping in die oprit van sy huis in Parkmore, Johannesburg geskiet is.
Momberg, seun van die voormalige Suid-Afrikaanse ambassadeur van Griekeland, is in die bors geskiet en die koeël het in sy arm vasgesit.
“Sy dokters het gesê hy kan baie gelukkig wees dat die koeël nie sy belangrike organe getref het nie,” het Momberg se broer Altus Dinsdag aan Sapa gesê.
“Hy sterk goed aan en het selfs die Varsity-wedstryd Maandagaand tussen die Maties en die Ikeys in die hospitaal gekyk. Ek dink sy vinnige herstel is te danke aan die Maties se oorwinning,” het sy broer gesê.
Die kapers het weggehardloop nadat hulle Momberg geskiet het en niks is gesteel nie.
Gerald Majola, uitvoerende hoof van Krieket Suid-Afrika, het Momberg alle sterkte toegewens.
“Lede van die krieketfamilie het ons gekontak om hul onsteltenis oor dié voorval uit te spreek,” het Majola gesê.
- Sapa