Lasith spel gevaar vir SA
2012-01-10 10:10
Kaapstad – Die besluit om die komende eendagkrieketreeks tussen Suid-Afrika en Sri Lanka hoofsaaklik in kleiner sentra te beslis, kan boemerang aangesien die toestande daar die besoekers, eerder as die tuisspan, gaan help.
Albie Morkel, die Proteas se veelsydige speler, het gister gesê hy dink dit kan veral in die wedstryde in die Paarl en Kimberley die geval wees.
Die reeks begin Woensdagmiddag op Bolandpark in die Paarl.
“Dié blaaie is gewoonlik stadiger met minder wip as in die res van die land en dit kan die gaping tussen die spanne kleiner maak.
Nie dat dit nie klaar ’n moeilike reeks vir ons sou gewees het nie. Sri Lanka het immers skaars 8 maande gelede in die eindstryd van die Wêreldbeker-toernooi gespeel,” het Morkel verduidelik.
Die ander drie wedstryde word in Oos-Londen, Bloemfontein en Johannesburg gespeel.
Ook Oos-Londen is ’n veld wat vir sy dooie kolfblad berug is.
“Sri Lanka het ook twee baie gevaarlike aanvangskolwers en dit kan sukkel om hulle hok te slaan op ’n blad wat min hulp aan die boulers verleen,” het Morkel gesê.
Hy het natuurlik verwys ná die kaptein, Tillakaratne Dilshan, en sy aanvangsmaat, Upul Tharanga.
Morkel het ook gesê die Proteas se oorwinning met 2-1 in die toetsreeks gaan nie veel van ’n invloed op die eendagreeks hê nie.
“Ek glo die Sri Lankane is vol moed al het hulle die reeks verloor.
Hulle het beter gevaar as wat mense verwag het en die sege in Durban sou hulle baie selfvertroue gegee het.
“Dan moet daar ook nie vergeet word dat hulle verlede jaar in die Wêreldbeker-eindstryd gespeel het nie. Ek dink dit gaan ’n moeilike reeks wees.”
Morkel het 14 maande laas vir die Proteas gespeel en is terug in die nasionale groep nadat Dean Elgar met ’n kniebesering onttrek het.
Buiten kolwervriendelike blaaie, gaan die Proteas ook ’n plan moet maak om die Sri Lankaanse snelbouler Lasith Malinga hok te slaan.
Malinga speel nie meer toetskrieket nie, maar is een van die gevaarlikste boulers in die korter weergawes van die spel.
Veral sy vermoë om streepbal op streepbal met hope vaart te boul, maak hom uiters gevaarlik.
“Hy is ’n groot bedreiging met die nuwe en die ou bal.
Die reëls het egter vanjaar verander met ’n boulspan wat met ’n nuwe bal van albei kante moet boul (effektief gaan elke bal dus net 25 beurte oud raak).
“Dit gaan interessant wees om te sien hoe hy gaan aanpas, want hy is ’n meester daarmee om omgekeerde swaai met die ou bal te bewerkstellig,” het Morkel gesê.
– Vir die jongste sportnuus, volg Nuus24Sport op Twitter.
– Sport24