Laaste paaltjies van SA kantel

2012-11-11 08:11

Brisbane – Suid-Afrika se totaal vir sy eerste kolfbeurt in Brisbane het die 400-kerf verbygesteek, maar Australië het daarin geslaag om in die middagsessie van die derde dag op die Gabba die res van die Proteas se paaltjies te neem.

Die Proteas het teen die teepouse met 'n telling van 434 vir sewe ná 148 boulbeurte gehad.

Suid-Afrika het uiteindelik 'n telling van 450 bereik voor Ben Hilfenhaus Dale Steyn (15) en Morne Morkel (0) se paaltjies laat kantel het. JP Duminy kon weens 'n besering nie kolf nie.

Australië het Kallis kort na middagete terug pawiljoen toe gestuur met 147 lopies agter sy naam, ná Rob Quiney hom uitgevang het. Kallis het 349 minute lank diens gedoen voor die paaltjies. Dit was ook sy 44ste toets-honderdtal.

Pattinson het sy derde paaltjie van die kolfbeurt geëis toe David Warner vir AB de Villiers uitgevang het vir 40 lopies, en Vernon Philander is deur Michael Clarke uitgevang met 11 lopies op die telbord.

Jacques Rudolph het 31 lopies aangeteken voor die draaibouler Nathan Lyon sy paaltjie geëis het met die hulp van Quiney.

Hashim Amla het voor die middagete sy derde honderdtal in vier kolfbeurte teen Australië bereik, en is uiteindelik been-voor-paaltjie betrap met 104 lopies agter sy naam.

– Vir die jongste sportnuus volg Nuus24Sport op Twitter.

- Sapa - AFP