Krieketbaas: Majola het gelieg oor bonusse
2011-01-20 09:58
Johannesburg - Krieket Suid-Afrika se president, Mtutuzeli Nyoka, het die uitvoerende hoof van Krieket Suid-Afrika, Gerald Majola, op die John Robbie se Radio702-ontbytprogram daarvan beskuldig dat hy oor bonusse gelieg het.
"Dr. Nyoka het gesê Gerald Majola het gelieg oor die kwessie van die Indiese Premierliga-bonusse wat aan amptenare van KSA betaal is," het Robbie op sy Twitter-profiel getweet, nadat hy Donderdagoggend 'n radio-onderhoud met Nyoka gevoer het.
Nyoka het oor die sogenaamde KSA-bonusskandaal gepraat nadat hy glo gevra is om uit sy pos te bedank.
Sport24 het in Augustus berig dat Majola en meer as 40 ander werknemers altesaam R4,7miljoen se “ongemagtigde bonusse” ontvang het vir die aanbieding van verlede jaar se Indiese Premierliga en die Kampioenetrofee-reeks.
Dié geld is nooit aan KSA se uitvoerende raad óf finansiële en besoldigingskomitee verklaar nie. Daarna is ’n komitee onder leiding van die voormalige hoofregter Pius Langa op die been gebring om hierdie en ook ander bewerings van geldelike wanbestuur te ondersoek.
Majola is na 'n interne ondersoek onskuldig bevind van enige ongerymdhede.
Robbie het verder getweet: "Dr Nyoka het gesê dat daar aan hom gesê is dat niemand ooit betaal is nie. Hy sê verder KSA sal nooit die waarheid kan begrawe nie."
Die krieketpresidente, wat vroeër erg verdeeld was in hul steun vir Nyoka en Majola, het die afgelope week “albei se kant van dié saak aangehoor” en besluit Nyoka se kop moet rol.
Na wat verneem word sal die adjunk-president A.K Khan as president waarneem tot KSA se volgende algemene jaarvergadering.
Vir die jongste sportnuus volg Nuus24Sport op Twitter.
- Sport24