Krieket se grootbase kry R45 miljoen
2011-12-04 10:02
Johannesburg – Sowat R45 miljoen is verlede jaar net aan salarisse vir die grootbase van Krieket Suid-Afrika (KSA), insluitend Gerald Majola, uitvoerende hoof, betaal.
Dit sluit nie bonusse in nie, soos die onverklaarde R1,75 miljoen wat Majola glo aan homself toegeken het vir die aanbied van die Indiese Premierliga-toernooi in Suid-Afrika in 2009.
Dié bonusse vir KSA-werknemers, wat altesame sowat R4,5 miljoen beloop, word nou deur ’n kommissie van ondersoek na die geldsake van KSA ondersoek.
Dié kommissie, wat op Loftus Versfeld in Pretoria vergader, het die afgelope week gehoor Majola het aan alle KSA-hoofkantoor-werknemers, insluitend skoonmakers, bonusse van tussen R5 000 en R10 000 uitgedeel ná die IPL-toernooi.
Die kommissie, onder leiding van regter Chris Nicholson, is deur die regering aangestel nadat in ’n KPMG-verslag aanbeveel is dat KSA se vergoedings-en-reistoelae-beleid hersien word. In dié verslag, waarop KSA sowat R6 miljoen uitgegee het, is bevind die Majola-bonusse is nooit verklaar nie en dat Majola die Maatskappyewet glo verskeie kere oortree het.
Dr. Mtutuzeli Nyoka, geskorste president van KSA, het vroeër voor die kommissie getuig hy het ook ’n reistoelaag van R1 miljoen vir Majola goedgekeur.
Majola sal na verwagting Woensdag voor die kommissie getuig.
Talle hooggeplaastes in KSA, onder wie die waarnemende president, A.K. Khan, het die afgelope week getuig Majola het nie bedoel om die bonusse op ’n korrupte manier te verdoesel nie, hy het dit net nie verklaar nie.
Khan meen Majola is “goed vir die transformasie van krieket in Suid-Afrika, al verstaan hy nie die Maatskappyewet óf die funksies van ’n uitvoerende hoof nie”.
KSA het verlede jaar ’n omset van meer as R700 miljoen gehad.
Don McIntosh, oudbedryfshoof van KSA wat self ’n bonus van R799 999 gekry het, het Donderdag getuig te veel vingers wys nou na Majola.
Volgens McIntosh is dit egter nie net Majola wat ruim deur KSA vergoed is nie, maar ook die grootbase van al die provinsiale krieketunies.
“Hul salarisse wissel tussen R500 000 en R1,5 miljoen per jaar. Majola het sowat R155 000 per maand verdien.”
KSA se laaste jaarverslag dui egter daarop dat Majola verlede jaar R5,3 miljoen net aan salarisse verdien het.
“Ek weet egter van hoofde van klein unies, soos byvoorbeeld Grens, wat pakkette van sowat R2 miljoen per jaar verdien het.
“As mens alle voordele van unies se grootbase bymekaar tel, verdien hulle nie veel minder as Majola nie,” het McIntosh gesê.
Dié grootbase, wat nog direkteure van KSA is, word verder ook nog sowat R2 500 betaal vir elke vergadering wat hulle bywoon.
Nicholson wou by McIntosh weet of dié soort vergoeding redelik is vir iemand wat vir ’n artikel 21-maatskappy soos KSA werk “waarvan die meeste geld eintlik vir die ontwikkeling van krieket moet gaan”.
McIntosh het geantwoord: “Ons (KSA) het ’n omset van R600 miljoen gehad. Hiervan is R22 miljoen gebruik net vir die salarisse van KSA-personeel by hoofkantoor.
“Nog R22 miljoen tot R23 miljoen was vir salarisse van provinsiale personeel.”
Volgens hom maak dié salarisse eintlik maar net sowat 5% van KSA se omset uit.
Volg Nuus24 op Twitter
- Rapport
