Krieket SA swyg oor Majola-verslag wat uitlek
2010-11-15 08:26
Bloemfontein. – Krieket Suid-Afrika se president, Mtutuzeli Nyoka, wou Sondag nie ’n woord rep oor ’n vertroulike verslag waarin hy glo geldelike onbehoorlikheid deur sy uitvoerende hoof, Gerald Majola, bevestig het nie.
The Sunday Times het Sondag dele uit ’n verslag van 12 bladsye, wat volgens dié koerant deur Nyoka geskryf is, gepubliseer.
Nyoka sou die verslag aan KSA se interne ondersoekspan oorhandig wat bonusse aan Majola en 39 ander personeellede ondersoek waaroor Sport24 vroeër eerste berig het.
“Ek weet nie wie die verslag uitgereik het nie. Ek kan nie kommentaar lewer nie,” het Nyoka aan ESPNcricinfo gesê.
Nyoka het glo in sy verslag bevestig dat R318 238 aan Majola se vrou vir reiskoste betaal is en dat geen bewyse bestaan hoe bonusse van R4,7 m ná verlede jaar se Indiese Premierliga (IPL) uitbetaal is nie.
Majola het reeds vroeër sy bonus van meer as R1 m terugbetaal. KSA se nuwe ondersoekspan onder leiding van sy vise-president, AK Khan, sal glo Vrydag sy bevindinge bekend maak.
Bly op hoogte van al die jongste sportnuus deur Nuus24Sport op Twitter te volg.
- Sport24