Kragspel hou WB-sleutel
2010-03-01 09:28
Ahmedabad - Die deurslaggewende rol wat die kragspel in volgende jaar se Wêreldbeker-kriekettoernooi gaan speel, is een van die lesse wat die Proteas in die verkorte eendagreeks in Indië geleer het.
Kallis, waarnemende kaptein, het Saterdagaand hier gepraat nadat sy Suid-Afrikaanse span die laaste wedstryd van die kitsreeks met 90 lopies gewen het.
Die grondslag vir dié klinkende oorwinning is gelê deur ’n fantastiese vennootskap van 173 lopies van 103 balle tussen Kallis en AB de Villiers. Hulle het gewys hoe belangrik veral die derde kragspel is.
Die Proteas het 44 lopies in die 41ste tot die 45ste boulbeurte geslaan.
Maar dié twee ster-kolwers het momentum van dié kragspel gebruik en het daarna eers versnel deur 78 lopies in die laaste vyf beurte te moker om die Proteas tot ’n indrukwekkende 365/2 te voer.
“Ek dink die derde kragspel (kolwers se een) gaan van kardinale belang in die Wêreldbeker-toernooi wees. Ons sal moet seker maak dat ons die regte planne het en dit dan deurvoer. Die ouens (in die span) het hard daaraan gewerk en het beslis verbeter. Dis een van die positiewe dinge wat ons uit dié reeks kan neem,” meen Kallis.
Die Proteas het die reeks met 1-2 verloor nadat hulle in Jaipur en Gwalior vasgeval het.
Kallis, wat ingestaan het as kaptein vir die beseerde Graeme Smith, glo die boulers het die toer ook geweldig leersaam gevind.
“Van die jonger boulers het nie veel ervaring van die subkontinent nie, veral nie op internasionale vlak nie. Wat hulle hier geleer het, gaan hulle net in die toekoms help.”
In die derde wedstryd het ál Suid-Afrika se top-kolwers die eerste keer tot hul reg gekom.
Corrie van Zyl, die Proteas se nuwe breier, het verlede week heeltyd gepraat oor hoe belangrik vennootskappe op die subkontinent se mak kolfblaaie is.
Hashim Amla en Loots Bosman het met ’n vennootskap van 113 lopies afgesit voor Amla en Kallis 79 lopies om die tweede paaltjie aangeteken het. Dít is gevolg deur die onoorwonne vennootskap tussen De Villiers (102*) en Kallis (104*).
“Dit het beslis gehelp dat ons ’n goeie begin gehad het,” het Kallis gesê.
“Die ouens bo-aan die kolflys verdien krediet.
“Hul goeie kolfwerk het die lewe baie makliker gemaak vir die res van ons.”
Hoewel die Proteas in hul noppies was met die vertoning en dié sege, moet in gedagte gehou word dat Indië met ’n amperse B-span gespeel het.
Mahendra Singh Dhoni was so te sê die enigste ervare lid van die tuisspan en die Indiërs het steeds amper 300 teen die Proteas gemoker.
Daar wag dus nog baie werk voordat die Proteas hulle as aanspraakmakers op Wêreldbeker-glorie kan beskou.
- Sport24