Kommer oor Boucher ná ernstige oogbesering
2012-07-10 07:30
Kaapstad – Die Suid-Afrikaanse krieketheld Mark Boucher het Maandagaand 'n noodoperasie ondergaan nadat ’n dwarsbalkie hom op die eerste dag van die Proteas se toer in die oog getref het, het Krieket Suid-Afrika in 'n verklaring op sy webwerf gesê.
Die balkie het in die lug gespring nadat die draaibouler Imran Tahir vir Gemaal Hussain, kolwer van die graafskap Somerset, skoongeboul het, berig Beeld.
Dr. Mohammed Moosajee, spanbestuurder, het in die verklaring gesê Boucher het ’n skeur aan die sklera (die witdeel van sy oog) opgedoen en ’n noodoperasie is Maandagaand op hom uitgevoer.
Moosajee wou nie uitwei oor die moontlikheid dat Boucher die sig in dié oog kan verloor nie, maar het gesê dit is ’n ernstige besering.
“Die oftalmoloog is ’n bietjie bekommerd.
“As gevolg van die bloeding kon hulle nie die omvang van die skade bepaal nie en hy moet daarom teater toe gaan.”
Boucher het, soos verwag kan word, teenaan die paaltjies gestaan, maar het ’n pet eerder as ’n helm gedra omdat Tahir besig was om te boul, berig Sapa-AFP.
Nou sal ’n plaasvervanger-paaltjiewagter moontlik aangevra word, met Thami Tsolekile van die Lions die waarskynlikste kandidaat.
– Volg Nuus24Sport op Twitter
