Knoeiery: drie se toer verby?
2010-09-02 09:46
Taunton, Engeland – Drie Pakistanse krieketspelers wat betrokke is by bewerings van weddenskap-knoeiery is Woensdag Londen toe vir ondervraging en dit lyk of hul Engelse toer verby is.
Die kaptein, Salman Butt, asook die boulers Mohammad Aamir en Mohammad Asif, sal vandag se wedstryd teen Somerset misloop.
Hulle is vergesel deur die span se veiligheidshoof, majoor Khawaja Najam, asook private veiligheidspersoneel en polisiebeamptes.
Butt het net sy kop geskud toe hy deur verslaggewers gevra is of hy skuldig is.
Die drietal sal vandag deur die voorsitter van Pakistan se Krieketraad (PCB), Ijaz Butt, asook Wajid Shamsul Hasan, Pakistan se hoë kommissaris in Londen, ondervra word.
Dit lyk al meer of nie een van hulle weer op die toer in aksie gesien sal word terwyl die ondersoek voortduur nie.
Naas vandag se opwarmwedstryd teen Somerset, speel Pakistan ook twee twintig20-wedstryde teen Engeland en vyf eendagstryde.
Die Internasionale Krieketraad (IKR) het belowe daar sal vinnig en daadwerklik opgetree word as die bewerings van knoeiery bewys kan word.
Haroon Lorgat, uitvoerende hoof van die IKR, sê hy hoop daar sal binne die volgende paar dae “’n soort van ’n uitslag kan wees”.
Volgens Angus Porter, die uitvoerende hoof van die Spelersvereniging, is Engeland se spelers nie juis genoeë om teen Pakistan uit te stap as die drietal in die span is.
“Die Engelse spelers besef dit is belangrik vir die wedstryde om voort te gaan en hulle sal professioneel optree, maar hulle sal dit moeilik vind om teen die spelers te speel wat direk betrokke is by die knoeiery-bewerings.”
Die IKR se anti-korrupsie eenheid het Asif se voormalige vriendin, die aktrise Veena Malik, beveel om getuienis te lewer in die ondersoek.
Sy het in ’n onderhoud gesê ’n Indiese man het Asif gereeld op sy selfoon gebel, wat haar laat wonder het of hy nie betrokke is by wedstryd-knoeiery nie.
Bangladesj se Shakib Al Hasan en Tamim Iqbal het onthul hulle is ook in Januarie tydens die tuisreeks teen Indië deur wedders genader.
Die IKR se anti-korrupsie eenheid is dadelik daarvan in kennis gestel.
Shakib sê dit was nie die enigste keer dat hy genader is nie. In 2008 is hy ook glo deur ’n wedder genader wat egter nooit direk gesê het hy moet ’n wedstryd knoei nie, maar dat hy glo ’n borg van hom (Shakib) wil wees.
“Ek het egter uit die manier waarop hy gepraat het, afgelei hy wil dalk hê ek moet iets doen en ek het dit aangemeld,” het Shakib gesê.
Bly op hoogte van al die jongste sportnuus deur Nuus24Sport op Twitter te volg.
- Sport24