Knoeiery: Aus-spelers sê hulle is genader
2010-08-31 09:48
Sydney - Die Australiese krieketspeler Shane Watson het Dinsdag onthul dat hy en sy spanmaat, Brad Haddin, tydens verlede jaar se Reeks om die As in Engeland, deur ‘n onwettige Indiese beroepswedder genader is.
Watson het gesê hy én Haddin het die Australiese spanbestuur in kennis gestel omdat die man “meer intens” was as die ondersteuners wat krieketspelers gewoonlik nader.
Dié onwettige beroepswedder het die spelers ontmoet toe Australië in ‘n eksklusiewe hotel in Londen gewoon het tydens die Reeks om die As. Hy het die 29-jarige Watson se spel geprys voor hy hom vir drankies en ‘n “bietjie plesier” uitgenooi het.
Watson het later uitgevind dat die Indiër ‘n onwettige beroepswedder was.
Die onthulling volg na koerantberigte dat twee Pakistanse spelers opsetlik foutballe in verlede week se toets teen Engeland geboul het, in ruil vir geld.
Watson het gesê hy is jammer om te hoor oor die moontlike betrokkenheid van die jong bouler Mohammad Amir in dié saak.
“Vir hom voel ek die jammerste, want hy is jonk en naïef. Elke keer as ek teen hom gespeel het, het Amir nog altyd 100% gegee. Hy het briljante tegniek vir ‘n 19-jarige bouler, het hy bygevoeg.
Bly op hoogte van al die jongste sportnuus deur Nuus24Sport op Twitter te volg.
- Sport24