'Knoeiers' uit Pak-span gelaat
2010-09-02 12:27
Engeland - Die bestuurder van Pakistan se krieketspan, Yawar Saeed, het aangekondig dat die drie spelers wat by moontlike wedstryd-knoeiery betrokke is, nie in die opkomende twintig20- en eendagwedstryde teen Engeland sal speel nie.
Saeed het gesê Salman Butt (kaptein), Mohammad Asif en Mohammad Amir is nie geskors nie, maar dat hulle nie verder in Pakistan se toer in Engeland sal speel nie.
Hy het bygevoeg dat 13 spelers beskikbaar sal wees vir die twee kitswedstryde voordat drie plaasvervangers genoem sal word vir die vyf eendagwedstryde teen Engeland.
Die drieling het Donderdag se wedstryd teen Somerset misgeloop nadat hulle ontbied is vir ondervraging deur die voorsitter van Pakistan se Krieketraad (PCB), Ijaz Butt, asook Wajid Shamsul Hasan, Pakistan se hoë kommissaris in Londen.
Hulle is vergesel deur die span se veiligheidshoof, majoor Khawaja Najam, asook private veiligheidspersoneel en polisiebeamptes.
Bly op hoogte van al die jongste sportnuus deur Nuus24Sport op Twitter te volg.
- Sport24