Knights ‘het nie met bal gepeuter’
2012-01-13 08:45
Bloemfontein – Die Australiese vervaardiger van die krieketbal waaroor vroeër in ’n SuperSport-wedstryd ’n bohaai gemaak is, kon geen beduidende fout daarmee vind nie.
Die skeidsregters het sake deurentyd in Kimberley gemonitor nadat die Knights vroeg al oor die gehalte van die bal in die kragmeting met die Warriors gekla het.
Die Knights se aanvangsbouler, Johan van der Wath, het selfs onderneem om ’n kort aflewering te boul sodat Colin Ingram die bal net moet wegslaan.
Later, toe 5 van die Warriors-kolwers met 30 aflewerings in hul eerste beurt uitgehaal is, is beweringe van balpeutery gemaak.
Rian Cloete, ’n lid van Krieket Suid-Afrika se regskomitee, kon soos die skeidsregters, geen bewyse vind dat daar wel met die bal gepeuter is nie.
Omdat die gehalte daarvan ter sprake was, het hy aanbeveel dat die bal weggestuur word vir toetse by ’n onafhanklike liggaam soos die Wetenskaplike en Nywerheidsnavorsingsraad (WNNR).
Die WNNR kon nie die verlangde toetse doen nie.
Die betrokke bal waarmee 61.2 boulbeurte afgestuur is, is toe weggestuur na die vervaardiger, Kookaburra in Australië.
’n Bal waarmee die Warriors 82 boulbeurte geboul het, is ook saam.
Kookaburra sê in sy verklaring Noel Miller het wip- en hardheidtoetse met die balle gedoen.
Volgens dié toetse is die verwagte afname in wip en hardheid wat bespeur was, steeds van ’n aanvaarbare vlak.
Daar is in Australië bevind “dit lyk nie of die balle op enige wyse beskadig is of mee gepeuter is nie”.
“Daar is twee skrape op die Warriors se bal wat interessant is, maar ek glo nie dit sou die vertoning van die bal beïnvloed het nie selfs al is dit self aangebring,” het Kookaburra se direkteur Rob Elliot, gesê.
Die toetsuitslae is saam met die balle teruggestuur.
– Vir die jongste sportnuus volg Nuus24Sport op Twitter.
– Sport24