'Kleiner' spanne se WB-hoop kry hupstoot
2011-05-11 21:57
Londen - Ierland se hoop om by die volgende wêreldbeker-kriekettoernooi betrokke te wees, het ‘n hupstoot gekry danksy ‘n aanbeveling van die Internasionale Krieketraad (IKR) se krieketkomitee dat ‘n kwalifiseringsproses ingestel moet word.
Die IKR het vroeër voorgestel dat die toernooi kleiner gemaak word van vanjaar se 14 spanne tot net die 10 toetsspelende lande in die 2015-toernooi.
Die komitee het egter nou voorgestel dat ‘n soort kwalifiseringsproses ingestel word nadat Sharad Pawar, IKR-president, ‘n hersiening aangevra het namens “kleiner” spanne soos Ierland, wat Engeland geklop het en net-net die kwarteindstryd misgeloop het.
Die IKR se algemene bestuurder, David Richardson, het gesê een moontlikheid is dat die ranglys vir eendag-wedstryde gebruik kan word om spanne te laat kwalifiseer.
Ierland is op die oomblik 10de op die ranglys – een plek bo Zimbabwe, wat ‘n toetsspelende land is.
- Volg Nuus24 op Twitter
- Sapa - AP