Kiwi's gekritiseer ná 'skandalige' vertoning
2013-01-03 09:03
Wellington – Nieu-Seeland se sukkelende krieketspan is Donderdag skerp gekritiseer nadat hulle vir net 45 lopies op dag een van die eerste toets teen die Proteas op Nuweland uitgeboul is.
Dit was hul laagste toetstelling in amper vier dekades.
Kane Williamson was die enigste kolwer wat Woensdag dubbelsyfers kon haal. Hy is been-voor-paaltjie betrap vir 13 deur ‘n verwoestende Vernon Philander wat vyf paaltjies geneem het in minder as 45 minute.
“Weereens heeltemal in die verleentheid gestel,” het Radio Sport in Nieu-Seeland berig te midde van wydverspreide veroordeling van die swak vertoning.
Die “skandalige 45” was ‘n “uiterste verleentheid”, het Martin Devlin van TV One gesê.
Brendon McCullum, kaptein van die Kiwi’s, het die loot gewen en besluit om eerste te kolf. Sy besluit het egter lelik skeef geloop.
Philander se verwoestende boulwerk, wat goed bygestaan is deur Dale Steyn en Morné Morkel, het veroorsaak dat die Kiwi’s net 19.2 boulbeurte voor die penne spandeer het.
Die veteraan krieketskrywer David Leggat het dit die swakste vertoning genoem wat hy nog ooit gesien het in die 30 jaar wat hy Nieu-Seelandse krieket dek.
“Ná die kolf-gemors was die boulwerk ook nie goed genoeg nie en van die veldwerk was sommer amateuragtig,” het hy in die New Zealand Herald geskryf.
Dit was Nieu-Seeland se eerste keer terug op die krieketveld nadat die voormalige kaptein, Ross Taylor, homself vroeg in Desember onbeskikbaar gestel het vir die kriekettoer na Suid-Afrika nadat hy as kaptein afgedank en deur McCullum vervang is.
Die Proteas het 252 vir die verlies van drie paaltjies teen uitskeityd aangeteken, ‘n voorsprong van 207 lopies.
AB de Villiers en Alviro Petersen is voor die penne op onderskeidelik 19 en 103.
Vir die jongste sportnuus volg Nuus24Sport op Twitter.
- Sapa - AFP
