King weerspreek Majola se verweer
2012-01-28 08:30
Pretoria – Oudregter Mervyn King het in Mei 2009 ’n aanbieding oor goeie korporatiewe bestuur gedoen aan Krieket Suid-Afrika (KSA) se raad en uitvoerende hoof, Gerald Majola.
King, wat destyds voorsitter van KSA se komitee vir regs- en korporatiewe bestuur was, het Vrydag in Pretoria voor die Nicholson-kommissie getuig dat hy toe die noodsaaklikheid van die skriftelike verklaring van belange bespreek het.
Majola het verlede jaar voor die kommissie beweer hy was nie bewus van die korrekte stappe om belange te verklaar nie.
Majola het byna R1,8 miljoen gekry vir die aanbieding van die Indiese Premierliga-toernooi (IPL) en die Kampioenetrofeereeks in 2009, maar dit nie aan KSA se uitvoerende raad of sy finansiële en besoldigingskomitee verklaar nie.
Dié kommissie spruit uit ’n forensiese oudit deur KPMG wat bevind het dat tientalle KSA-amptenare ongemagtigde bonusse van miljoene rande ontvang het en na bewering bepalings van die Maatskappywet oortree het.
Fikile Mbalula, minister van sport en ontspanning, het die kommissie ook opdrag gegee om KSA se werking en bestuur te ondersoek.
King, ook voorsitter van die internasionale korporatiewe-bestuursraad, het in 2008 en 2009 in die KSA se komitee vir regs- en korporatiewe bestuur gedien.
KSA se raad het hom nie eens in kennis gestel dat hy nie meer in dié komitee dien nie.
Hy het dit van “derde partye” verneem, het King getuig.
Die oorgrote meerderheid van die wins van ’n art. 21-maatskappy, soos wat KSA is, moet vir die ontwikkeling van die sport gaan, het hy getuig.
“As direkteur van ’n maatskappy moet jy jouself ’n paar belangrike vrae vra, waarvan die belangrikste seker is: Het ek enige botsende betrokkenheid?”
Belange moet behoorlik op skrif aan die raad bekend gemaak word.
“Goedertrou beteken om in ’n maatskappy se belang op te tree en nie vir jou eie hebsug nie,” het King gesê.
Regter Chris Nicholson het gister gesê King was die laaste getuie voor die kommissie.
Hy verwag dat die kommissie teen einde Februarie sy aanbeveling aan Mbalula sal doen.
– Bly op hoogte van al die jongste sportnuus deur Nuus24Sport op Twitter te volg
- Beeld