‘Kersgeskenk’ toe nagmerrie vir Sri Lanka
2011-12-27 09:24
Durban – Toe die Sri Lankaanse krieketspan gisteroggend hoor Vernon Philander moes aan die Suid-Afrikaanse elftal onttrek word weens ’n eina linkerknie, het dié besoekers sweerlik gedink Sinterklaas het 24 uur laat gekom.
Maar hoewel dit die meteoriese opgang van dié Kaapse naatbouler (vir eers) gestuit het, het dit aan nóg ’n Protea-groentjie sy eerste proesel van toetskrieket besorg.
En Marchant de Lange het níé teleurgestel nie.
Waar Philander se knaende lyn-en-lengte-boulwerk die Sri Lankaanse kolwers in die eerste toets oorhoops gehad het, was dit De Lange se ongebreidelde vaart en aggressie wat gister hul kniekoppe laat klap het.
Sy 4/60 het die toerspan vroeg in die knyp gehad, voordat ’n vennootskap van 111 lopies om die sesde paaltjie tussen Thilan Samaraweera (86* lopies, 218 balle, 10x4) en Dinesh Chandimal (58, 86 b, 7x4) sake beredder het vir die besoekers.
Samaraweera en Rangana Herath (0*, 0 b) sal vanoggend op 289/7 voortkolf, nadat De Lange sy voorneme sommer reeds met die intrapslag duidelik gemaak het.
Sy eerste aflewering – ’n opslagbal van diep in die 140 km/h – het Tillakaratne Dilshan se nuwe Kersonderbroek bederf, voordat sy aanvangsmaat, Tharanga Paranavitana (12, 29 b, 1x4), oomblikke later dié 21-jarige Tzaneen-boorling se eerste toetsslagoffer geword het met ’n halfhartige dryfhou buite die wegpen.
Kumar Sangakkara (0, 3 b) is twee De Lange-aflewerings later op soortgelyke wyse uit, voordat Dilshan (47, 69 b, 6x4) en Mahela Jayawardene – wat die negende lid van die 10 000-klub geword het – saam ’n waaksame 37 lopies om die derde paaltjie bymekaargeskraap het.
Die Sri Lankaanse kaptein moes terugstap toe ’n soveelste vrot aflewering deur Imran Tahir (1/87) kort voor die middagete in die hande van Morné Morkel op die skerpby-grens beland het, waarna Morkel (2/55) oomblikke daarna Jayawardene (31, 58 b, 3x4, 1x6) se paaltjies in alle rigtings laat spat het.
Die Geluksgodin het nog twee keer breed geglimlag vir die tuisspan – eers toe De Lange vir Angelo Mathews (30, 51 b, 5x4) met sy swakste aflewering van die dag uitgehaal en Morkel kort voor die uitskeityd ook Chandimal se hardnekkige beurt met ’n hierjy-bal beëindig het.
De Lange het die skaal teruggeswaai in die Suid-Afrikaners se guns deur ook van Thisara Perera (12, 28 b, 2x4) ontslae te raak; tog sal die tuisspan nie juis oorstelp wees van vreugde om vandag wéér hul boulstewels te moet aantrek nie.
Dié kolfblad het nie naastenby soveel duiwels as die een in Centurion nie, maar gister was Dale Steyn (0/55) skadeloos, Tahir hou nie dieselfde bedreiging in as op die kitsveld nie en Morkel was veel beter – maar steeds nie bestendig genoeg nie.
– Vir die jongste sportnuus volg Nuus24Sport op Twitter.
– Sport24