Kepler sê daar is weer vrede met Smith
2010-05-18 09:08
Christo Buchner
Johannesburg - Kepler Wessels het gesê die lug is gesuiwer tussen hom en die Suid-Afrikaanse krieketkaptein, Graeme Smith, nadat dié op die sosiale netwerk, Twitter, uitgevaar het oor uitlatings van die oud-kaptein.
Wessels, ’n keurder én die kolfkonsultant van die nasionale span, het ná die Proteas se rampspoed in die Twintig20-Wêreldtoernooi gesê jonger spelers moes in die span gewees het.
Smith se reaksie op Twitter was: “Ek vind dit verbasend dat Kepler sê ons moes ’n jonger groep gekies het. Hy is dan een van die keurders. Ongelooflik.” Wessels het gister gesê dit was alles ’n misverstand en dat hy die aangeleentheid reeds met die spanbestuur in die Wes-Indiese Eilande bespreek en uitgeklaar het.
“Daar moet nie nou ’n berg van ’n molshoop gemaak word nie,” het Wessels gesê.
Smith het ook uitgevaar teen kritiek van oud-spelers: “Ons het verantwoordelikheid aanvaar dat ons power gespeel het. Maar ek sien nie dat ’n wennersmedalje om die sogenaamde kenners en voormalige spelers se nekke hang nie.”
Wessels het gesê hy steun die span ten volle en voel op die Windies-toer moet daar vooruitgang met “klein treëtjies” gemaak word.
“Ek wil verbetering op alle vlakke van ons spel sien in die Windies. Ek glo daar lê ’n positiewe ses weke voor waarin die basiese dinge reg gedoen word,” sê Wessels.
“Die harde werk lê voor wanneer die span terugkom van die toer af om hom gereed te kry vir aanstaande jaar se Wêreldbeker.”
Bly op hoogte van al die jongste sportnuus deur Nuus24Sport op Twitter te volg.
- Sport24