Kepler gaan Corrie help
2010-01-28 07:10
Michael Green
Oos-Londen - Corrie van Zyl, die Proteas se tydelike hoofafrigter, het gister die voormalige Proteas-kaptein Kepler Wessels se hulp ingeroep vir die toer na Indië.
“Ek gaan Kepler as kolfkonsultant gebruik. As kommentator ken hy die spelers en weet hy wat hul sterk en swak punte is,” het Van Zyl hier op ’n mediakonferensie by Hemingways Casino gesê.
“Ek het geweldig baie respek vir hom en glo hy het die kennis om die taak suksesvol te verrig.”
Hy het ook gesê Vincent Barnes bly aan as boulafrigter.
Volgens Van Zyl was dit “natuurlik nie die ideale omstandighede” om as afrigter oor te neem nie.
“Ek was die laaste nege maande by Krieket Suid-Afrika se Sentrum vir Uitnemendheid en het gereeld nou saam met Mickey Arthur gewerk.
“Dit is waar my fokus tot Maandag was en nou moet ek my fokus verskuif,” het Van Zyl gesê.
“Daarom ontmoet ek more (vandag) vir Graeme Smith (Proteas-kaptein) in Kaapstad om my fokus reg ingestel te kry op die span en die toer.
“Ek het my manier van dinge doen en ek sal dit ook met Graeme bespreek.”
Smith het op sy beurt gesê Arthur se bedanking laat ’n groot leemte.
“Maar die spelers sal so professioneel moontlik probeer wees en sal dit verwerk.”
Hy het bygevoeg dat Van Zyl “weet wat in die span aangaan” en hy behoort dus gemaklik in te skakel.
“Ons was vyf jaar saam met Mickey en was in daardie tyd ’n slag die nr. 1-span ter wêreld.
“Ons wil dit weer wees,” het Smith gesê.
Volgens Van Zyl verwag hy dat die spelers verantwoordelikheid aanvaar. “My taak sal wees om die spelers ordentlik voor te berei sodat die kaptein hulle met vertroue op die veld kan lei,” het hy gesê.
“Ek sal geen steen onaangeroer laat om dit gedoen te kry nie; en as ek dit nie self kan doen nie, sal ek iemand kry wat my kan help.”
Op gister se mediakonferensie was Gerald Majola, KSA se uitvoerende hoof, nog hoopvol dat Arthur in die een of ander hoedanigheid deur KSA behou sal word.
Arthur het egter gesê hy het as afrigter van die Proteas bedank omdat hy voel dit is in sy én die span “se beste belang”.
“Verskille het tussen my en Krieket Suid-Afrika se raad ontstaan oor hoe om die Proteas weer bo in wêreldkrieket te kry en ek glo nie ek kan die span onder dié omstandighede vorentoe neem nie,” het Arthur gesê.
Majola het aangedui dat van die aangeleenthede wat daartoe gelei het dat Arthur bedank het op 19 Februarie op KSA se raadsvergadering bespreek sal word.
Die Proteas vertrek Saterdag na Indië waar hulle in twee toetse en drie internasionale eendagwedstryde sal speel.
- Die Burger