Kaptein bedank oor Alviro se aanstelling
2010-11-19 11:35
Londen - Jamie Dalrymple, die kaptein van die Walliese graafskapspan Glamorgan, het Donderdag summier bedank nadat bekend gemaak is dat die Proteas se aanvangskolwer, Alviro Petersen, die leisels by hom gaan oorneem.
Dalrymple het gesê hy het "geen respek" vir Glamorgan se voorsitter, Paul Russel, nie.
Dié klub se president, Peter Walker, het óók sy bedanking ingedien. Walker se bedanking volg 'n dag nadat die klubbestuurder, Matthew Maynard, gekies het om sy tasse te pak eerder as om 'n verlaging in posvlak (na die van afrigter) te aanvaar.
"Ek het vandag (Donderdag) bedank, het Dalrymple in 'n verklaring gesê.
"Ek doen dit omdat Glamorgan my effektief afgedank het deur die kapteinskap van my weg te vat en 'n nuwe oorsese speler in die span te bring en as kaptein aan te stel, sonder om dit enigsins vooraf met my te bespreek.
"Ek verstaan nietemin dat die klub 'n reg het om die kapteinskap van my weg te vat. En ek besef dat die resultate in ons eendagwedstryde nie op die vlak is waarmee ons gelukkig kan wees nie," het Dalrymple bygevoeg.
Dié voormalige Engeland draaibouler het nog 'n jaar oor op sy kontrak.
Bly op hoogte van al die jongste sportnuus deur Nuus24Sport op Twitter te volg.
- Sport24