'Kallis was nie dronk' - spanbestuurder
2010-12-21 13:13
Kaapstad – Die spanbestuurder van die Proteas sê die sterkolwer Jacques Kallis was nie onder die invloed van drank toe hy Dinsdagoggend deur die hek van 'n huis in Wynberg gery het nie.
Die ongeluk het kort ná 02:00 plaasgevind.
Kallis se Audi R8 is weggesleep en sy modelmeisie, Shamone Jardim, het hom ná die ongeluk opgelaai.
Dr. Mohammed Moosajee, die Proteas se spanbestuurder, het gesê Kallis was nie beseer nie en die vraag is of hy alkohol gedrink het.
"Ek dink dit is die eerste ding waaraan almal dink. Die polisie is na die toneel ontbied en daar was niks snaaks nie. Jacques is nie beseer nie en die motor moes weggesleep word omdat die band pap was."
Intussen het die Wes-Kaapse polisie gesê dit was nie nodig om ná die ongeluk 'n asemtoets te doen nie.
Ao. November Filander, polisiewoordvoerder vir Kaapstad, het gesê die saak word as 'n normale ongeluk beskou.
Lees meer hier
Volg Nuus24 op Twitter