Kallis verloor eerste paaltjie in IPL
2010-03-24 08:22
Sportredaksie
Kaapstad – Jacques Kallis het uiteindelik sy paaltjie in vanjaar se Indiese Premierliga verloor, maar dit het nie die Royal Challengers Bangalore gekeer om hul vierde wedstryd van die kriekettoernooi te wen nie.
Hoewel Kallis, ’n lopiemasjien in dié reeks, net 19 kon kry, het die Challengers die Chennai Super Kings in Bangalore tot 135/7 beperk vir ’n sege met 36 lopies.
Ray Jennings (afrigter) se span is nou bo-aan die puntelys met 8 punte ná vyf wedstryde.
Voor dié beurt het Kallis nie sy paaltjie in vier kolfbeurte verloor nie.
Dít beteken die toernooi se grootste lopievraat spog nou met ’n allemintige gemiddelde van 283 lopies.
Nie te sleg vir ’n speler wat in 2007 as nie goed genoeg geag is om die Proteas se groep te haal vir die Twintig20-wêreldtoernooi nie.
Die Challengers het vinnig begin, maar effe die pad byster geraak toe Muttiah Muralitharan twee paaltjies – Manish Pandey en Virat Kohli – in sy tweede beurt laat kantel het.
Op 115/3 ná 15 beurte het dit gelyk of hulle sou sukkel om 150 te bereik, maar die gevaarlike Robin Uthappa het ander planne gehad.
Dié mokerman het die beurt gered met ’n blitsige, onoorwonne 68 (38 balle), wat 3 viere en 6 sesse ingesluit het, en Bangalore tot ’n indrukwekkende totaal van 171/5 gevoer.
Die Super Kings sal hulself egter skop oor die lewens wat hulle dié gevaarman gegun het.
Ravichandran Ashwin het hom met sy telling op 5 in die dekke van Muralitharan se boulwerk laat val, terwyl Murali Vijay hom nog ’n lewe gegun het toe hy ’n maklike kans op diepby van Albie Morkel se boulwerk laat val het.
Mathhew Hayden (32), met sy aardige Mongoose-kolf, was die Super Kings se groot hoop, maar die span se kolfbeurt het in duie gestort nadat dié veteraan van Australië sy paaltjie verloor het.
- Sport24