Kallis steek 13 000-kerf verby

2013-01-02 16:43

Kaapstad – Die Proteas-staatmaker Jacques Kallis het Woensdag die vierde krieketspeler ooit geword om 13 000 toetslopies aan te teken.

Kallis moes teen die begin van Suid-Afrika se eerste toets teen Nieu-Seeland op Nuweland slegs 20 lopies aanteken om dié mylpaal te bereik, en hy het dit gedoen in 36 balle.

Dit was Kallis se 159ste toetswedstryd.

Slegs Indië se Sachin Tendulkar (15 645), Ricky Ponting van Australië (13 378) en Rahul Dravid, ook van Indië (13 288), het al die 13 000-kerfstok bereik. Kallis het egter dié lopies aangeteken in heelwat minder toetse as die ander rekordhouers.

Die 37-jarige speler van Kaapstad het al 44 keer in 'n toets 'n honderdtal aangeteken.

Sy hoogste telling was die 224 lopies wat hy 'n jaar gelede op Nuweland teen Sri Lanka aangeteken het.

Die Proteas was ná 46,2 boulbeurte op die eerste dag van die eerste toets met 150 lopies voor, ná hulle Nieu-Seeland tot slegs 45 lopies beperk het in die besoekers se eerste kolfbeurt.

– Volg Nuus24 op Twitter.

- SAPA