Kallis reg vir 150ste toets
2012-01-02 16:26
Kaapstad – Die Suid-Afrikaanse staatmaker Jacques Kallis sal Dinsdag sy 150ste toets vir die nasionale span speel wanneer die Proteas teen Sri Lanka te staan kom in die derde en finale toets in Kaapstad.
Kallis, 36, het in Desember 1995 sy debuut teen Engeland gemaak en het al 12 036 toetslopies agter sy naam – 'n gemiddeld van 56.24 per wedstryd.
Dié totaal is die vierde beste in die wêreld, na Sachin Tendulkar (15 288), Rahul Dravid (13 172) en Ricky Ponting (12 778).
Nie net het Kallis al 40 keer 'n hoderdtal aangeteken nie, maar hy het 'n jaar gelede in Centurion teen Indië vir die eerste keer in sy loopbaan meer as 200 lopies aangeteken – 201 nie uit nie.
"Hy (Kallis) is steeds hoogs gemotiveerd om goed te doen en wanneer ons later in die jaar na Nieu-Seeland, Engeland en Australië gaan, sal hy 'n sleutelrol vir ons moet speel," het Graeme Smith gesê.
"Dis 'n groot jaar vir ons en almal wil suksesvol wees."
– Vir die jongste sportnuus volg Nuus24Sport op Twitter.