Kallis lig Proteas se knelpunte uit
2010-05-26 10:04
Christo Buchner
Johannesburg - Die gebrek aan groot slaners teen die einde van die kolfbeurt en boulers wat die lopiekraan kan help toedraai, is deur Jacques Kallis geïdentifiseer as van die probleme wat die Suid-Afrikaanse span het.
Al het Graeme Smith se krieketspan die Windies eergister in die tweede eendagstryd met 17 lopies geklop, was daar nog verskeie kwelpunte.
Die kolf- en boulwerk aan die stertkant het gelol. Suid-Afrika het 300/5 gekry en danksy Darren Sammy se rekordbeurt van 58 onoorwonne lopies, het die Windies by 283 in 48.1 beurte uitgekom.
Hashim Amla (92) was weer die rigtingwyser in die SA beurt. Kallis, wat Shaun Pollock se rekord vir die meeste eendagstryde vir Suid-Afrika verbeter het tot 296, het 85 lopies geslaan.
Dit wou nooit voorkom asof die Windies naby die teiken sou uitkom nie, maar Sammy se aanslag teen die einde van die beurt het dit veel nader laat lyk as wat dit werklik was.
Hy het die Windies-rekord vir die vinnigste vyftigtal, slegs 20 balle, daargestel. Uiteindelik het hy net 24 balle trotseer en twee viere en ses sesse geslaan.
Sy swaaiende kolf het die boulsyfers verrinneweer. Morné Morkel het wel drie paaltjies geneem, maar dit het hom 58 lopies gekos.
“Ons sal beslis aandag moet gee aan ons boulwerk aan die einde van die beurt,” het Kallis erken.
“Dit is al asof die boulers tussen twee lengtes vasgevang is. Dit is egter iets wat hulle vir hulself moet uitsorteer,” sê hy.
Suid-Afrika se nuwe mees ervare eendagspeler glo ook die gebrek aan groot slaners teen die einde van die beurt is ’n probleem.
Noudat daar nie ’n Albie Morkel of Mark Boucher in hierdie span is vir daardie laaste klompie beurte nie, “gebruik ons nie die eindbeurte so goed soos waaraan gewoond is nie.”
Suid-Afrika loop wel nou met 2-0 voor in die reeks van vyf wedstryde, met die volgende twee wat Vrydag en Sondag in Dominica plaasvind.
Bly op hoogte van al die jongste sportnuus deur Nuus24Sport op Twitter te volg.
- Sport24