Kallis lei Challengers na sege
2010-03-17 09:25
Eduan Roos
Johannesburg – Jacques Kallis het Dinsdag die laaste twyfel oor sy vermoë as blitskolwer begrawe.
Hy het hy feitlik op eie houtjie aan die Royal Challengers Bangalore hul eerste sege van vanjaar se Indiese Premierliga (IPL)-toernooi besorg.
Kallis was in verwoestende luim en danksy sy onoorwonne beurt van 89 (van net 55 balle) kon die Challengers die Kings XI Punjab se stewige wenteiken van 203/3 reeds in die voorlaaste beurt verbysteek.
Kallis, wat in die Challengers se eerste wedstryd teen die Kolkata Knight Riders ook ’n onoorwonne 65 aangeteken het, is nou die voorste lopiemaker in vanjaar se toernooi.
Dié veelsydige Suid-Afrikaner was veral genadeloos teenoor sy landgenoot Yusuf Abdulla (0/36 in 2.5 boulbeurte).
Dít nadat hy vroeër ook die waardevolle paaltjie van Manvinder Bisla (75) platgetrek het.
Vroeër het Ravi Bopara (77) en Bisla 129 lopies om die eerste Kings XI-paaltjie opgestapel.
Daarna het Kallis en Robin Uthappa (51) stukrag aan die Challengers se yslike lopiejaagtog gegee.
In Kolkata het die Chennai Super Kings die Knight Riders met 55 lopies ore aangesit.
Mahendra Singh Dhoni, die wenspan se kaptein en paaltjiewagter, het wéér onder die boulwerk ingeklim.
Sy 66* en Subraman Badrinath (45*) se puik vennootskap van 109 lopies om die vierde paaltjie het die tuisspan se doppie vroeg reeds geklink.
Nie een van die Proteas se groot slaners, Albie Morkel en Justin Kemp, het eens kolfkans gekry nie.
Dié twee het wel met die bal uitgeblink en die Knight Riders is vir net 109 uitgehaal, in antwoord op die Super Kings se stewige 164/3.
Kemp (wat 3/12 platgetrek het), is Dinsdag by die voorlopige Protea-groep van 18 vir die Twintig20-Wêreldbeker ingesluit ná ’n afwesigheid van bykans drie jaar.
Morkel (1/6) is op uiters verrassende wyse weggelaat uit die span vir die Suid-Afrikaners se toer na die Wes-Indiese Eilande later vanjaar.
- Sport24