Kallis is SA krieketspeler van die jaar
2011-06-07 23:01
Johannesburg - Jacques Kalles is Dinsdag by die Suid-Afrikaanse Kriekettoekeningsgeleentheid by Gallagher Estate in Midrand, Johannesburg, as die krieketspeler van die jaar aangewys.
Dit is die tweede maal wat Kallis dié gesogte toekenning wen. Die vorige keer was in 2004.
Hy het vanjaar ‘n driekuns toekennings opgeraap – hy is ook as die Castle Toetsspeler van die jaar aangewys en het die KFC “So Good”-toekenning ontvang vir sy honderdtalle in albei kolfbeurte van die toetswedstryd teen Indië op Nuweland, ondanks die feit dat hy aan ‘n pynvolle besering gely het.
Anders as verlede jaar, toe Hashim Amla byna skoonskip gemaak het, was die toekennings goed verspreid. AB de Villiers is as Eendagspeler van die jaar aangewys en Amla is as die Spelers se speler án die SA Aanhangers se speler van die jaar aangewys.
Lonwabo Tsotsobe is as die Pro20-speler van die jaar aangewys.
Imran Tahir, wat as SA Internasionale Nuweling van die jaar aangewys is, was ook ‘n groot wenner in die provinsiale kategorieë.
Hy is aangewys as die Supersportreeks se Krieketspeler van die jaar.
Die lys wenners is:
KSA Afrigter van die jaar: Richard Pybus (Nashua Mobile Cape Cobras)
KSA Veldopsigter van die jaar: Louis Kruger (Senwes Park)
KSA Tellinghouersvereniging van die jaar: Gauteng
Skeidsregters se skeidsregter van die jaar: Johan Cloete
KSA Skeidsregter van die jaar: Johan Cloete
MTN40 Krieketspeler van die jaar: Faf du Plessis (Nashua Titans)
Standard Bank Pro20 Krieketspeler van die jaar: Owais Shah (Nashua Mobile Cape Cobras)
Supersportreeks Krieketspeler van die jaar: Imran Tahir (Sunfoil Dolphins)
Internasionale toekennings
SA Nuweling van die jaar: Imran Tahir
Standard Bank Internasionale Pro20 Krieketspeler van die jaar: Lonwabo Tsotsobe
Standard Bank Eendag Krieketspeler van die jaar: AB de Villiers
Castle Toetsspeler van die jaar: Jacques Kallis
KFC “So Good!” toekenning: Jacques Kallis
KSA Aanhangers se speler van die jaar: Hashim Amla
Spelers se speler van die jaar: Hashim Amla
SA Krieketspeler van die jaar: Jacques Kallis
- Vir die jongste sportnuus, volg Nuus24Sport op Twitter
- SAPA