Kallis in beheer op Nuweland
2012-01-03 18:29
Kaapstad – Jacques Kallis het sy 150ste toetswedstryd vir die Proteas gevier met 'n telling van 159 nie uit nie op die eerste dag van Suid-Afrika se derde toetswedstryd teen Sri Lanka op Nuweland.
Suid-Afrika het teen die einde van die dag op 347/3 te staan gekom, met AB de Villiers op 45 nie uit nie.
Dit was Kallis se 41ste toets-honderdtal – maar sy eerste honderdtal teen Sri Lanka. Hy het nou 'n honderdtal aangeteken teen al nege ander lande wat toetse speel.
Hy is die 12de kolwer en die tweede Suid-Afrikaner (ná die Proteas se afrigter, Gary Kirsten), om dié mylpaal te bereik.
Kallis het met sy honderdtal ook die 12 000-kerf verbygesteek.
Ook Alviro Petersen het uitgeblink. Hy het sy terugkeer na toetskrieket gevier met sy tweede toetshonderdtal – 'n teiken wat hy bereik het in net 165 balle.
Petersen is na die teepouse vir 109 terug pawiljoen toe gestuur deur Chanaka Welegedara.
– Vir die jongste sportnuus volg Nuus24Sport op Twitter.
- SAPA