KSA vra Gibbs om verskoning
2010-12-05 12:51
Kaapstad – Krieket Suid-Afrika (KSA) het aan Herschelle Gibbs om verskoning gevra nadat hulle ‘onakkurate inligting’ rakende die beeïndiging van sy kontrak vrygestel het.
KSA het Vrydag in ‘n verklaring gesê dat Gibbs se kontrak in ooreenstemming met hom gekanselleer is.
Maar Sondag is ‘n verklaring deur KSA uitgereik waarin hulle om verskoning vra omdat hulle die aankondiging so haastig gemaak het.
“Ná vele gesprekke, en in die beste belange van Krieket Suid-Afrika, het KSA in ooreenstemming met Gibbs besluit om sy nasionale krieketkontrak te kanselleer,” het Gerald Majola, uitvoerende hoof van KSA gesê.
“Daar is besluit dat dit die beste uitweg vorentoe vir albei partye sal wees.”
“Namens KSA wil ek Herschelle alles van die beste vir die toekoms toewens en hom bedank vir sy bydrae wat hy tot die sukses van die Proteas gemaak het.”
“Herschelle het ons land vir 14 jaar verteenwoordig en ek dink nie enige krieketliefhebber sal ooit die bydrae wat hy gemaak het in die 438-wedstryd teen Austalië vergeet nie.”
Gibbs mag steeds die Protea-span haal indien hy gekies word en het daarop aangedring dat hy 'n kans gegun word om in die Twintig20-reeks wat later hierdie maand in Nieu-Seeland sal plaasvind te speel, indien hy die span sou maak. KSA het ingestem om dit te doen.
Gibbs het verlede maand sy kontroversiële outobiografie, To The Point, vrygestel waarin hy heelwat oor die Proteas se gedrag op toer te sê gehad het.
Ná die boek se vrystelling het KSA hul prokureurs gevra om daarna te kyk en gesê raad sal 'n besluit oor die aangeleentheid maak.
Die regterhandse kolwer wat sy debuut in 1996 vir die Proteas gemaak het, het in 90 toetse, 248 eendagwedstryde en 23 T20 Internasionale wedstryde gespeel.
- Bly op hoogte van al die jongste sportnuus deur Nuus24Sport op Twitter te volg
- SAPA