Jong Proteas blom ondanks hitte
2012-01-17 10:10
Kaapstad – Dit het bloedsweet gekos, maar ’n goeie boulvertoning deur die Suid-Afrikaanse o.19-krieketspan het hom gister sy eerste oorwinning oor Pakistan in die driehoekige reeks, wat Zimbabwe insluit, besorg.
Die tuisspan het met 42 lopies hier op Nuweland geseëvier nadat sy boulers die besoekers vir 198 uitgeknikker het.
Dit was ’n belangrike sege vir die Suid-Afrikaners nadat hulle tot dusver nog net met die sukkelende Zimbabwiërs kon afreken.
Die tuisspan het verlede Vrydag met 59 lopies teen die Pakistani’s vasgeval en het Zimbabwe Saterdag met 6 paaltjies afgeransel.
Gister se wedstryd is in bloedige hitte gespeel, met die kwik wat verby die 35°C-kerf geklim het. ’n Sege in sulke uitdagende toestande sal die jong Suid-Afrikaners se selfvertroue ’n groot hupstoot vir die res van die reeks gee.
Suid-Afrika (240/7) het die loot gewen en besluit om eerste te kolf. Sy kaptein, Quinton de Kock (7), het wéér met die kolf misluk nadat hy in die eerste kragmeting met Zimbabwe ’n onoorwonne honderdtal aangeteken het. Hy het sedertdien gesukkel om noemenswaardige bydraes met die kolf te lewer.
Shaylin Pillay (40) en Theunis de Bruyn (73) het ’n vennootskap van 98 lopies om die vierde paaltjie gedeel voordat Pillay deur Fawad Khan skoongeboul is.
Diego Rosier (2) is kort daarna uitgehardloop voordat De Bruyn met die telling op 204 uitgevang is.
Zia-ul-Haq (2/30) en Usman Qadir (2/37) het skaflik met die bal vertoon.
Pakistan (198) se kolfbeurt kon nie slegter begin het nie toe Sami Aslam (8), Babar Azam (1) en Faraz Ali (8) hul paaltjies binne nege boulbeurte verloor het.
Rabian Engelbrecht (1/37) en Corné Dry (3/42) het uitstekend geboul om die besoekers op 50/4 te laat steier.
Op 107/6 was die Asiërs nog verder in die moeilikheid voordat Mohammad Nawaz (34) en Usman Qadir (52, 36 b) hul span hoop gegee het met ’n vennootskap van 50 lopies.
Dit het trouens gelyk of die wedstryd op ’n spannende einde gaan afstuur, maar Qadir sal homself skop nadat hy met die telling op 190 uitgehardloop is toe hy ’n gewaagde tweede lopie wou neem.
Prenelan Subrayen (2/21) het die laaste twee paaltjies laat kantel.
Suid-Afrika pak Zimbabwe vandag en speel Donderdag teen Pakistan op Coetzenburg.
– Vir die jongste sportnuus volg Nuus24Sport op Twitter.
– Sport24