Jesse Ryder geskors oor drinkery

2012-03-01 12:07

Wellington – Die Nieu-Seelandse kolwer Jesse Ryder en snelbouler Doug Bracewel is geskors nadat hulle spanreëls oor alkoholgebruik oortree het.

In 'n verklaring wat Donderdag uitgereik is, het Nieu-Seeland Krieket gesê die spelers sal Saterdag se derde en laaste eendagwedstryd teen Suid-Afrika misloop omdat hulle by 'n hotel in Napier gedrink het ná Woensdag se nederlaag in die tweede eendagwedstryd.

Volgens die spanreëls word spelers wat beseer is verbied om enige alkohol te drink.

Bracewell sukkel met 'n stywe dyspier en Ryder het 'n ligte handbesering.

Volgens die krieketvereniging se verklaring het die spelers ook op onvanpaste wyse by die hotel reageer op 'n getergery deur 'n lid van die publiek.

Nieu-Seeland se spanbestuurder, Mike Sadle, het gesê albei spelers het verskoning gevra en "hulle weet hulle het die ondersteuners en hul spanmaats in die steek gelaat."

Ryder was voorheen al in die moeilikheid oor drank.

In 2008 het Ryder sy hand beseer toe hy 'n venster in 'n hoteltoilet stukkend geslaan het.

En in 2010 is hy gewaarsku en beboet vir wangedrag by 'n binnenshuise kriekettoernooi.

Nieu-Seeland sal Vrydag sy span aankondig vir die opkomende toetsreeks van drie wedstryde teen Suid-Afrika.

Vir die jongste sportnuus volg Nuus24Sport op Twitter.

- Sapa - AP