JP wil man teen wipballe staan
2009-12-11 08:52
Christo buchner
Johannesburg - Wanneer die eerste kriekettoets tussen Suid-Afrika en Engeland Woensdag in Centurion begin, sal dit op ’n dag na presies ’n jaar wees sedert JP Duminy sy onverwagse, maar uiters suksesvolle toetsdebuut op die Waca in Perth gemaak het.
“Dit voel of dit veel langer as ’n jaar gelede is,” glimlag hy as hy gesels oor sy vertonings in Australië wat die krieketwêreld se verbeelding aangegryp het.
“Ek kan eerlikwaar nie veel daarvan onthou nie. Dit voel alles so half onwerklik. Ek onthou wel hoe ek my kolf in die lug gehou het om die applous vir my honderdtal in Melbourne te erken,” sê hy.
Skaars ’n jaar later bevind hy hom by ’n kruispad in sy baie belowende loopbaan. Die uitdaging wat Engeland oor die volgende maand of wat aan Duminy bied – en hoe hy dit hanteer – kan ’n rigtingwyser vir hom wees.
“Ja, ek weet wat hulle sê van jou tweede seisoen in internasionale krieket. Hierdie is die een waarin ek myself moet vestig,” sê hy.
Die Engelse glo hulle het die resep om hom aan bande te lê: Duminy gaan ’n dieet van kort balle gevoer word nadat hy twee keer in die eendagreeks sy paaltjie met sulke aflewerings verloor het.
Hy trek sy mond so half skeef as hy praat oor sy beweerde kwesbaarheid teen kort aflewerings.
“Ek het nog nooit regtig daarmee gesukkel nie.
“Dis nou maar toevallig dat ek my paaltjie twee keer só verloor het.
“Ek dink dit is maar eintlik net ’n sielkundige ding.
“Jy moet net nie dat dit in jou kop vassteek nie.
“Dit is goed en wel vir die Engelse as hulle dink hulle het nou my nommer.
“Ek is egter oorgehaal om die teendeel te bewys.
“Ek gaan die volgende klompie dae hard daaraan werk – en ook in die nette baie kort balle trotseer om te sorg ek is op my gemak daarmee,” sê Duminy.
“Die seisoen by die Cobras (in die Kampioene-liga in Indië) het só goed vir my begin en ek het ook my eerste internasionale eendag-honderdtal (teen Zimbabwe) gekry, maar skielik voel dinge nie so lekker nie.
“Ek moet net weer my tydsberekening regkry.”
Duminy sê hoewel die Engelse nie die blitsboulers van die Aussies het nie, is hulle baie bedrewe en hou ’n bedreiging vir Suid-Afrika se kolwers in.
“James Anderson is waarskynlik hul groot gevaarman,” sê hy.
- Beeld