Indië staatmakers kwyt voor SA toets
2010-01-29 08:55
Nieu-Delhi – Suid-Afrika se kanse om die nr. 1-plek op die Internasionale Krieketraad se ranglys vir toetslande te herwin, het ’n hupstoot gekry.
Indië moet in die eerste toets teen die Proteas sonder drie van sy staatmakers klaarkom.
Die voormalige kaptein Rahul Dravid, die mokerman Yuvraj Singh en die naatbouler Sri Sreesanth sukkel met beserings en is nie deel van die groep van 15 spelers vir die eerste toets nie. Dié kragmeting begin volgende Saterdag in Nagpur.
Die Proteas moet slegs die reeks van twee toetse wen om Indië verby te steek en weer bo-aan die ranglys te pryk.
Dravid het sy kakebeen gebreek en Yuvraj sy linker-polsgewrig in die onlangse tweede toets teen Bangladesj in Dhaka beseer.
Sreesanth het ’n dyspierbesering in die eerste toets in Chittagong opgedoen.
Dravid was glo oorgehaal om te speel, maar die spandokters se raad was dat hy moet rus om te verhoed dat hy sy besering vererger.
Die groep is weens die lang beseringslys net vir die eerste toets aangewys. Dit is egter onwaarskynlik dat al drie spelers die tweede toets in Kolkata sal misloop. Dié toets begin op 14 Februarie.
Daar was egter goeie nuus vir Indië se afrigter, Gary Kirsten, en sy spanbestuur met die veteraankolwer VVS Laxman wat fiks verklaar is nadat hy in die Chittagong-toets steke in sy vinger benodig het.
Daar is drie groentjies in die groep vir die eerste toets – Subramaniam Badrinath (kolwer), Wriddhiman Saha (reserwe-paaltjiewagter) en die opwindende jong naatbouler Abhimanyu Mithun.
Mithun (20) het dié seisoen (sy eerste) 47 paaltjies in nege eersterangse wedstryde laat kantel. Hy het sy span, Karnataka, gehelp om die eindstryd van die Ranji-trofeereeks, Indië se weergawe van die Suid-Afrikaanse SuperSport-reeks, te haal.
Badrinath het al drie keer vir die Indiese eendagspan diens gedoen, maar wag nog vir sy eerste kans in die toetsarena.
Hy is amper verseker van ’n plek in die beginspan.
Hy is een van ses spesialis-kolwers in die groep en sal sy kans in Nagpur kry.
Die Indiese keurders het ook ’n Raadselftal aangewys wat ’n tweedag-oefenwedstryd teen die Proteas in Nagpur sal speel. Die wedstryd begin Dinsdag.
Die Raadselftal word aangevoer deur die uitstekende jong kolwer Rohit Sharma.
Die toetsgroep is:
Mahendra Singh Dhoni (k), Virender Sehwag, Gautam Gambhir, Murali Vijay, Sachin Tendulkar, VVS Laxman, Subramaniam Badrinath, Harbhajan Singh, Zaheer Khan, Ishant Sharma, Amit Mishra, Sudeep Tyagi, Pragyan Ojha, Abhimanyu Mithun, Wriddhiman Saha. – Sapa-AFP en cricinfo.com
- Beeld