Indië speel straks in 'gelukbringer-hemp'
2012-09-14 10:00
Nieu-Delhi – Indië se krieketspan is gevra om in dieselfde kriekethemp-ontwerp, waarin hulle verlede jaar se Wêreldbeker-toernooi gewen het, te speel wanneer die T20-toernooi volgende week in Sri Lanka afskop.
Nike, die span se klereborg, het vroeër die maand 'n nuwe T20-ontwerp onthul wat die nasionale kleure prominent vertoon en van die top-spelers het selfs by 'n modevertoning in die nuwe spandrag paradeer.
Krieketbase het die spelers egter gevra om dieselfde blou hempde te dra waarin hulle by verlede jaar se suksesvolle Wêreldbeker gespeel het, in 'n poging om geluk aan die span te bring, het die Times of India Vrydag berig.
"Dit is ons besluit om die spelers te vra om die hempde te dra wat hulle by die 2011 Wêreldbeker gebruik het," het 'n lid van die Indiese krieketraad, Ratnakar Shetty, aan die koerant gesê.
Indië het die eerste T20-toernooi in 2007 gewen, maar kon nie daarin slaag om die halfeindrondes in die 2009- en 2010-toernooie te haal nie.
Die nuwe T20-ontwerp is deur die kaptein Mahendra Singh Dhoni en senior kolwer Virender Sehwag verwelkom toe dit bekendgestel is.
Dhoni het gesê die ontwerp sal ondersteuners help om met die kortste weergawe van die spel te identifiseer.
"As ons ons speler in wit sien, weet ons hulle speel toetskrieket," het hy gesê.
"So ook met eendagkrieket. As jy hulle in blou sien, weet jy daar word 'n eendagwedstryd gespeel."
Sehwag het gesê hy hou van die nuwe kriekethemp omdat dit die nasionale kleure van rooi, wit en groen wys.
"Ek speel met my hart en ek speel vir die vlag," het hy gesê. "Ek hou van die trui omdat die nasionale kleure op my hart is."
Vir die jongste sportnuus volg Nuus24Sport op Twitter.
- AFP
