Indië-legende prys Smith
2010-02-10 20:42
Johannesburg – Die Indiese krieketlegende Sunil Gavaskar het Graeme Smith se leierskap geprys na die Proteas se sege in die eerste toets wat in Nagpur gespeel is.
“Daar was uit die aard van die saak heelwat verwarring in die Suid-Afrikaanse kamp nadat die afrigter skielik bedank het en die keurkomitee in die pad gesteek is,” het Gavaskar gesê.
“Smith mag dalk nie so baie lopies in hierdie wedstryd aangeteken het nie, maar hy het sy span gefokus gehou om uitstekende krieket op elk van die vier dae te speel.”
Gavaskar het ook iets te sê gehad oor Dale Steyn en hom beskryf as een van die beste eksponente van omgekeerde swaai sedert die Indiese krieketspeler Kapil Dev.
Dev word beskou as die beste aanvangsbouler in die geskiedenis van Indiese krieket.
Indië sal die tweede toetswedstryd Sondag in Kolkata moet wen as hulle hul status as nommer een toetsspan in die wêreld wil behou.
- Sport24