IPL-span dok miljoene op vir SA se Morris

2013-02-04 07:27

Johannesburg – Die Lions-snelbouler Chris Morris was Sondag een van die duurste spelers wat op die veiling van die Indiese Premierliga (IPL) verkoop is, het Sport24 berig.

Die Chennai Super Kings het die 25-jarige Morris vir ’n allemintige $625 000 (meer as R5,5 miljoen) opgeraap ná ’n groot toutrekkery met die Mumbai Indians en die Royal Challengers Bangalore.

Morris het dié veiling dopgehou terwyl sy span in Kimberley teen die Knights in 'n stryd gewikkel was.

“Ek het probeer om te konsentreer op die wedstryd, maar ek sal jok as ek sê die veiling was nie in my agterkop nie,” het hy aan Sport24 gesê.

“Ek is stomgeslaan deur die bedrag wat die Super Kings vir my betaal het. My aanvangsprys was maar $20 000 en om eindelik soveel te haal, is verregaande!”

Dié toernooi, wat in April in Indië begin, sal Morris se eerste kennismaking met dié land wees.

Morris het in Desember sy T20-buiging vir die Proteas gemaak.

– Lees hier meer.

– Volg Nuus24Sport op Twitter.