IPL dalk regte doepa vir Duminy
2010-02-26 14:41
Altus Momberg
Ahmedabad - Die handbesering wat JP Duminy Woensdag in Gwalior opgedoen het, is dalk net ’n bedekte seën vir dié beleërde Suid-Afrikaanse kolwer.
Duminy het gisteraand reeds na Suid-Afrika teruggekeer vir ’n tandarts-afspraak. Dit sal sy beseerde linkerhand terselfdertyd kans gee om te herstel.
Kepler Wessels, die Proteas se kolfkonsultant, meen dis ’n goeie ding vir Duminy om vir eers uit die spervuur te kom.
“Ons (die afrigters) het ’n paar tegniese en sielkundige aspekte aan hom genoem waaraan ons wil hê hy moet werk. Dis ’n goeie ding dat hy nou in die Indiese Premierliga (IPL) gaan speel waar die druk nie so groot is nie en hy sy selfvertroue kan herwin,” meen Wessels.
Duminy is ná ’n skitterende begin in sy internasionale loopbaan, skaars 14 maande gelede, die laaste ruk sy selfvertroue kwyt.
Dié linkshandige kolwer van die Kaap het hierdie seisoen net 129 lopies in 6 toetse teen ’n gemiddelde van 12.90 aangeteken. Hy kon slegs 3 keer in 10 kolfbeurte dubbelsyfers behaal.
Dit het nie veel beter in kitskrieket gegaan nie.
As die onoorwonne 111 teen Zimbabwe aan die begin van die seisoen buite rekening gelaat word, het hy slegs 88 lopies in 7 beurte sedert die begin van die toernooi om die Kampioene-trofee geslaan.
Dit is egter nie net sy lae tellings nie, maar ook die manier waarop hy sy paaltjie verloor wat kommer wek.
Hoewel hy vroeër in sy loopbaan uitstekend teen draaiboulers gevaar het, is hy nou die kluts kwyt teen veral ortodokse wegbreekboulers.
Wessels meen egter daar is geen rede waarom Duminy nie sy peil kan herwin nie.
“Dit is glad nie ongewoon vir jong spelers om ná vroeë sukses te sukkel wanneer die opposisie planne teen hulle begin beraam nie. Dit is dan die jong speler se taak om weer ’n teenvoeter vir dié planne te vind.
“JP het die wêreld se talent en ek glo hy kan terugveg.”
Wessels het intussen gewaarsku daar wag baie harde werk op die Proteas se eendagspan voor volgende jaar se Wêreldbeker-toernooi hier op die subkontinent.
Die voormalige Proteas-kaptein het gister gepraat nadat hy die laaste maand die span as kolfkonsultant en keurder bygestaan het.
“Ek dink die toetsspan is op die oomblik baie beter as die eendagspan.
“Die toetsspan is baie mededingend, maar daar wag baie harde werk op die eendagspan. Ons sal so gou as moontlik ons beste span moet identifiseer en dan dié span saamsnoer,” het Wessels gesê.
- Beeld