IKR moet nóú besluit – Clarke
2011-12-23 11:44
Melbourne – Die gebruik van tegnologie vir betwisbare beslissings op die krieketveld moet eenvormig geskied – óf daar moet in die geheel weggedoen word daarmee, sê Australië se kaptein, Michael Clarke.
Indië weier steeds dat die verwysingstelsel (DRS) ná skeidsregterbeslissings ingespan kan word in die toetsreeks teen Australië wat Maandag hier begin.
Die besoekers is nog nie heeltemal te vinde daarvoor nie en bevraagteken steeds die akkuraatheid daarvan.
Clarke het gesê dit is tyd vir die Internasionale Krieketraad (IKR) om te besluit of dit in toetse én eendagkrieket, of net in die een of die ander – of glad nie – gebruik gaan word. “Ek vind dit ’n klein bietjie onbestendig.”
Dié tegnologie, wat met been voor paaltjie-beslissings ingespan word en ook duidelik wys wanneer die bal die kolf of die handskoene getref het, is in die Aussies se onlangse twee reekse – teen Suid-Afrika en Nieu-Seeland – gebruik. Die IKR-reëls stel dit duidelik dat albei spanne in ’n reeks daartoe moet instem.
Krieket Australië (CA) het gehoop dat Indië tot ’n aangepaste stelsel sou instem. Die Indiese Krieketraad (BCCI) wou egter nie swig nie.
Indië se weiering beteken dat verkeerde beslissings nie herroep sal kan word nie.
Die gasheer-uitsaaier van die reeks, Channel Nine, wat baie tyd, geld en harde werk ingesit het om seker te maak dat hy die beste moontlike tegnologie ter wêreld het, sal vir die onthalwe van sy kykers steeds gevorderde kykweer-beeldmateriaal, soos wat gewoonlik vir die DRS gebruik word, vertoon. – smh.com.au
- Volg Nuus24Sport op Twitter
- Die Burger