Honderdtal wink vir Faf

2013-01-12 13:25

Port Elizabeth – Faf du Plessis het teen middagete Saterdag net een lopie gekort om sy honderdtal te bereik op die tweede dag van Suid-Afrika se tweede toets teen Nieu-Seeland in Port Elizabeth.

Die Proteas se telling was op 390/5.

Die tuisspan het in 'n stadige oggend Hashim Amla se paaltjie verloor en 65 lopies by die telling gevoeg ná spel 15 minute laat begin het weens reën.

Du Plessis is met 69 lopies op die telbord 'n tweede kans gegun toe die bal aan sy handskoen geraak het voor die paaltjiewagter dit gevang het. Hy is egter nie terug pawiljoen toe gestuur nie.

Nat toestande het dit vir beide kolwers en boulers moeilik gemaak, en Amla kon net vier lopies voeg by die totaal waarmee hy die dag begin het. Hy het 110 lopies van 235 balle aangeteken. 

Dean Elgar het teen middagete 31 lopies agter sy naam gehad.

– Volg Nuus24Sport op Twitter.

- SAPA