Hier is SA se top 5 krieketspelers
2009-11-09 19:08
Johannesburg – JP Duminy het uitgeblink bo die vyf Mutual and Federal Suid-Afrikaanse krieketspelers van die jaar wat Maandag aangekondig is by die bekendstelling van die 2009 SA Cricket Annual by die Wanderers.
Omdat dié toekenning nie twee keer aan iemand toegeken kan word nie was ‘n paar Protea-spelers van dié toekenning uitgesluit maar Duminy sou sonder twyfel onder dié vyf val ten spyte van vorige nominasies.
Nadat Duminy vir ‘n paar jaar saam met die Suid-Afrikaanse toetsspan getoer het en sy kans met geduld afgewag het, het hy eindelik die geleentheid gekry om te wys wat in hom steek toe Ashwell Prince verlede Desember tydens die eerste toets teen Australië in Perth beseer is.
Hy het die geleentheid met albei hande aangegryp.
Tydens die ses toetse wat hy in die 2008/2009 seisoen gespeel het, het Duminy 389 lopies aangeteken teen ‘n gemiddeld van 48.62.
Uit 14 eendag internasionale wedstryde het hy 412 lopies met ‘n gemiddeld van 45.77 aangeteken. Hy het ook 10 paaltjies geneem.
Behalwe vir Duminy is Roelof van der Merwe die enigste lid van die nasionale span wat onder die vyf spelers van die jaar val.
Die Dolphins se kaptein, Imraan Khan, wat 20 lopies as openingskolwer tydens sy debuut teen Australië in Kaapstad gemaak het, is die enigste ander speler onder die vyf wat al internasionale krieket gespeel het.
Tydens verlede jaar se SuperSport-reeks het hy die meeste lopies aangeteken met 835 teen 55.66.
Griqualand kolwer Wendell Bossenger (33) is ook onder die top vyf benoem vir sy bydrae tot tuiswedstryde. Hy het 13 seisoene se amateur krieket gespeel met ‘n gemiddeld van 34.16 in 107 wedstryde.
Die vyfde en laaste toekenning is aan die Cobras spinbouler Claude Henderson toegeken.
- Sapa