Halfeind-plekke in Pro20 gou bespreek
2010-02-19 13:12
Port Elizabeth. – Die einde van die Pro20-krieketreeks is in sig en dié naweek se laaste vier wedstryde gaan bepaal wie in die halfeindronde speel.
In dié stadium is net die sukkelende Dolphins (1 ligapunt) uit die prentjie.
Die Dolphins speel vanaand in Johannesburg teen die Lions (4 ) en het grootskaalse veranderinge aan hul span aangebring. Dit moet dalk as ’n waarskuwing vir die Lions dien, want die Dolphins is nie onder soveel druk soos die tuisspan nie.
Daar is ook die kans dat die Dolphins se geploeter in dié reeks gaan voortduur en dat die Lions sal wen.
As dit gebeur, sal die wenner van Sondag se kragmeting tussen die Lions en die Eagles (8) in Bloemfontein vir die halfeindronde kwalifiseer.
Die Warriors (12) sal vanaand op hul tuisveld probeer om hul plek bo-aan die puntelys met ’n oorwinning oor die Cape Cobras (9) te verstewig.
’n Totaal van 16 punte met een wedstryd oor sal die Warriors van die eerste plek én ’n tuiswedstryd in die halfeindronde verseker.
Die Cobras het nie in hul twee laaste wedstryde waffers gekolf nie, hoewel die boulers soms goed gevaar het.
Eergister het die Eagles, met ’n veglustige Morné van Wyk goed op dreef met die kolf, die Cobras se kanse ’n gevoelige knou toegedien.
Van Wyk het 85 onoorwonne lopies gemoker om sy span te help om die Cobras met 8 paaltjies te klop.
Vanaand sal die Cobras dus moet uithaal as hulle nog in die halfeindronde wil beland.
Maklik sal dit nie wees nie, want veral die Warriors se boulers, onder wie Rusty Theron en Lonwabo Tsotsobe, kan hulle laat bontstaan.