Groot kanonne brul
2011-11-25 09:29
Kaapstad. – Die Cape Cobras én die Warriors gaan Vrydagmiddag hier op Nuweland internasionale versterkings inspan in die Eendagbeker-krieketreeks.
Graeme Smith en Mark Boucher is weer vir die tuisspan beskikbaar, terwyl Ashwell Prince die Warriors se kolflys in die stryd tussen die twee voorlopers in die Eendagbeker-reeks sal versterk.
Albei spanne is so te sê verseker van ’n plek in die uitspeelrondes, maar die Warriors kan basies seker maak van die eerste plek op die puntelys as hulle met die Cobras afreken.
Daar is nog ’n kans dat die Cobras en selfs die Dolphins hulle kan verbysteek, maar dit is hoogs onwaarskynlik.
Die Cobras, wat die Knights Woensdag in Bloemfontein laat les opsê het, het die eerste kragmeting tussen dié twee spanne vroeër in die Baai net-net gewen. Reën het ’n groot sê in daardie stryd gehad.
Die reeks se eindronde word vanjaar op ’n nuwe grondslag beslis. Waar die boonste vier spanne voorheen in die halfeindronde gespeel het ten einde vir die eindstryd te kwalifiseer, sal net die drie topspanne vanjaar tot die uitspeelrondes deurdring.
Die span wat bo-aan die puntelys ná die ligawedstryde eindig, kwalifiseer outomaties vir ’n tuiseindstryd.
Die spanne wat tweede en derde eindig, speel dan teen mekaar om ’n plek in die eindstryd.
Die beseringspook wat die Knights in die Eendagbeker-reeks ontspoor het, het nog twee slagoffers geëis, skryf Johann de Jager.
Die aanvangskolwer Reeza Hendricks en die naatbouler Shadley van Schalkwyk is die jongste toevoegings tot die ellelange beseringslys.
Hendricks het ’n wond aan sy linkerhand, wat met steke geheg moes word. Hy het die besering in Woensdag se wedstryd teen die Cobras opgedoen toe hy ’n bal in die dekveld gekeer het.
Van Schalkwyk is die vierde speler wat met ’n dyspierbesering sukkel.
Dié twee sal nie in aksie wees in die herontmoeting met die Titans vandag in Kimberley nie.
- Die Lions en Dolphins raak vandag in Pietermaritzburg slaags.
Die Dolphins sal hoop dit is sonskynweer nadat vier van hul sewe wedstryde tot dusver vanweë reën afgelas moes word.
Vir die jongste sportnuus volg Nuus24Sport op Twitter.
– Sport24