Graeme se raad oor 'wipplank'
2012-01-03 08:46
Kaapstad – Suid-Afrika moet geestelik sterker word as hy die gewoonte wil afleer om ’n uitstekende vertoning met ’n skokkende een op te volg.
Graeme Smith, die Proteas se beleërde krieketkaptein, kon gister nie verklaar waarom sy span die laaste jare só wipplank ry nie.
“Dis baie moeilik om te sê. Dis is nie asof ons nie hard en doelgerig oefen ná seges nie. Om die waarheid te sê, het ons vanjaar onder Gary (Kirsten) en sy span nóg harder geoefen,” het hy gesê voor die beslissende toets vandag hier op Nuweland teen Sri Lanka begin. “Ek dink ons moet bloot geestelik sterker word.”
Suid-Afrika het verlede week een van sy mees vernederende loesings sedert sy terugkeer tot die internasionale arena (in 1992) behaal toe Sri Lanka hom met 208 lopies in Durban slae gegee het.
En dit was ’n Sri Lankaanse span wat skaars ’n toets in die afgelope 18 maande kon wen én die eerste toets in Centurion met ’n beurt en 81 lopies verloor het.
Sri Lanka was voor die Durban-oorwinning segeloos in 16 agtereenvolgende toetse.
Dit is nie die eerste keer dat die Proteas ’n skittervertoning met ’n patetiese een opgevolg het nie. Die probleem kan teruggeneem word na 2008 toe hulle die laaste toetse van die reekse in Engeland en Australië verloor het. Ja, dit was wel “dooie toetse” nadat die Proteas die reekse al beklink het, maar die patroon het toe begin.
Suid-Afrika was in Februarie 2010 op die randjie van ’n rare reekssege in Indië ná die slagting in Nagpur, maar het toe weer in Kolkata in duie gestort.
Einde 2010 was dit weer dieselfde storie op eie bodem teen Indië. Suid-Afrika het die eerste toets in Centurion met ’n beurt gewen, voor hy in die Kersfeestoets in Durban weer sleg uitgesak het.
Dié tendens het in 2011 teen Australië voortgeduur nadat ’n wondersege hier met ’n nederlaag op die Wanderers opgevolg is.
’n Geharder geestelike span gaan nodig wees om in ’n veeleisende jaar staande te bly. Ná Sri Lanka, wag wegreekse in Nieu-Seeland, Engeland en Australië.
– Vir die jongste sportnuus volg Nuus24Sport op Twitter